జూబ్లిహిల్స్ ఉపఎన్నికల్లో బీజేపీ బరిలో ఉన్నా, ఆ పార్టీ విజయం కోసం పెద్దగా కసరత్తు చేయడం లేదనే అభిప్రాయం వ్యక్తమవుతోంది. ముఖ్యంగా ఇతర పార్టీల మద్దతు కోసం ప్రయత్నించకపోవడం రాజకీయ వర్గాల్లో చర్చనీయాంశమైంది.
టీడీపీ ఎన్డీఏ కూటమిలో భాగమై ఉన్నా, బీజేపీ నేతలు ఇప్పటి వరకు చంద్రబాబుని గాని, టీడీపీ ప్రధాన నేతలను గాని సంప్రదించకపోవడం గమనార్హం. టీడీపీకి కొంత బలం ఉన్న ప్రాంతం జూబ్లిహిల్స్లో మద్దతు కోరకపోవడం రాజకీయంగా బీజేపీకి ప్రతికూలంగా మారవచ్చని విశ్లేషకులు అంటున్నారు.
తెలంగాణ టీడీపీ నాయకులు వెల్లడించిన ప్రకారం, “మద్దతు అడిగితే ఇవ్వండి” అని చంద్రబాబు ముందుగానే సూచించినట్లు సమాచారం. అయితే బీజేపీ నేతలు ఆ దిశగా ఎలాంటి ప్రయత్నం చేయలేదు. మరోవైపు, తెలంగాణ టీడీపీకి ప్రస్తుతం అధ్యక్షుడు లేకపోవడంతో, నేరుగా నిర్ణయాలు తీసుకునే నాయకత్వం లోపిస్తోంది.
ఇక జనసేన విషయానికొస్తే — పవన్ కళ్యాణ్ ఇంకా అధికారికంగా బీజేపీకి మద్దతు ప్రకటించలేదు. అయితే తెలంగాణలోని జనసేన నేతలు మాత్రం బీజేపీ నేతలతో కలసి మద్దతు ప్రకటించిన సందర్భాలు ఉన్నాయి. కానీ పవన్ నుంచి అధికారిక ప్రకటన రాకపోతే, ఆ మద్దతు అధికారికంగా పరిగణించబడకపోవచ్చని రాజకీయ విశ్లేషకులు చెబుతున్నారు.
పోలింగ్కు కేవలం కొన్ని రోజులు మాత్రమే ఉండగా, ఇప్పటికీ మద్దతు ప్రకటన రాకపోవడం ఆలస్యమైందనే అభిప్రాయం వ్యక్తమవుతోంది. అయినప్పటికీ, బీజేపీ నాయకులు “మేమంతా ఎన్డీఏలో భాగమే కాబట్టి సహజంగానే మద్దతు ఉంటుంది” అని చెప్పే స్థాయిలోనే పరిమితమవుతున్నారు.
ప్రచారాల్లో ఇప్పటికే టీడీపీ, జనసేన జెండాలు కనబడుతున్నా, పై స్థాయి నాయకుల మద్దతు ప్రకటన లేకపోవడం ఈ ఎన్నికల్లో బీజేపీ వ్యూహంపై ప్రశ్నలు లేవనెత్తుతోంది.
