హైదరాబాద్‌లోని ఉప్పల్ రాజీవ్ గాంధీ అంతర్జాతీయ క్రికెట్ స్టేడియం మరో హైవోల్టేజ్ అంతర్జాతీయ మ్యాచ్‌కు వేదికవుతోంది. అక్టోబర్ 14న రాత్రి 7 గంటలకు భారత్, వెస్టిండీస్ జట్ల మధ్య జరగనున్న నాలుగో టీ20 మ్యాచ్ కోసం మల్కాజ్‌గిరి పోలీస్ కమిషనరేట్ ఆధ్వర్యంలో పటిష్ఠమైన భద్రతా ఏర్పాట్లు పూర్తి చేశారు. ఈ మ్యాచ్ బందోబస్తు కోసం ఏకంగా 2,200 మంది పోలీసు సిబ్బందిని మోహరిస్తున్నట్లు అధికారులు వెల్లడించారు.
స్టేడియం లోపల, బయట ఎలాంటి అవాంఛనీయ ఘటనలు తలెత్తకుండా లా అండ్ ఆర్డర్, ట్రాఫిక్ పోలీసులు సమన్వయంతో పనిచేయనున్నారు. వీరితో పాటు షీ టీమ్స్, బాంబ్ డిటెక్షన్ అండ్ డిస్పోజల్ స్క్వాడ్, స్పెషల్ ఆపరేషన్స్ టీమ్ (SOT) వంటి ప్రత్యేక విభాగాలు రంగంలోకి దిగుతున్నాయి. స్టేడియంలోని 408 సీసీటీవీ కెమెరాలతో పాటు, పరిసర ప్రాంతాల్లో అత్యాధునిక డ్రోన్ల ద్వారా నిఘా ఏర్పాటు చేశారు. ప్రతి కదలికను ప్రత్యేక కమాండ్ కంట్రోల్ సెంటర్ ద్వారా ఎప్పటికప్పుడు పర్యవేక్షించనున్నారు.
ఈ సందర్భంగా మల్కాజ్‌గిరి పోలీస్ కమిషనర్ బి. సుమతి మాట్లాడుతూ.. మ్యాచ్ సజావుగా, ప్రశాంతంగా జరిగేందుకు పకడ్బందీ చర్యలు తీసుకున్నట్లు తెలిపారు. “మీ భద్రత మా బాధ్యత – మీ సహకారం మా బలం” అని పేర్కొంటూ, క్రికెట్ అభిమానులు మరియు ప్రేక్షకులు పోలీసుల నిబంధనలకు అనుగుణంగా సహకరించాలని విజ్ఞప్తి చేశారు.
