కన్నాట్ ప్లేస్‌లోని సెంట్రల్ పార్క్‌ను మూసివేస్తూ న్యూఢిల్లీ మున్సిపల్ కౌన్సిల్ (NDMC) తీసుకున్న నిర్ణయాన్ని సవాల్ చేస్తూ దాఖలైన పిటిషన్‌పై అత్యవసర విచారణ చేపట్టేందుకు సుప్రీంకోర్టు నిరాకరించింది. ప్రధాన న్యాయమూర్తి జస్టిస్ సూర్యకాంత్, జస్టిస్ జాయ్‌మాల్య బాగ్చీలతో కూడిన ధర్మాసనం “అందరికీ మంచి బుద్ధి ప్రబలుతుందని ఆశిస్తున్నాం” అని వ్యాఖ్యానించింది. నిరసన తెలిపే హక్కు, శాంతిభద్రతలు మరియు చిన్న వ్యాపారుల జీవనోపాధి పరస్పరం ముడిపడి ఉన్నాయని ధర్మాసనం గుర్తుచేసింది. వ్యాపారులకు నిజంగా ఆర్థిక నష్టం వాటిల్లితే రాజ్యాంగ పరిధిలో జోక్యం చేసుకుంటామని చెబుతూ, ఈ పిటిషన్‌పై అక్టోబర్ 26 లేదా 27న విచారణ చేపట్టే అవకాశం ఉందని సూచించింది.
ఆందోళనల నేపథ్యం: కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే పిలుపునిచ్చిన ‘లెహ్రా దో తిరంగ’ ఆందోళన కార్యక్రమమే ఈ వివాదానికి కారణం. ఓటర్ల జాబితాల సమగ్ర సవరణపై నిరసన తెలుపుతూ చీఫ్ ఎలక్షన్ కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ జంతర్ మంతర్ వద్ద నిరసన తెలిపిన CJP నాయకులు సౌరవ్ దాస్, అశుతోష్ రాంకాలను పోలీసులు అరెస్ట్ చేసి తీహార్ జైలుకు తరలించారు. వీరి అరెస్ట్‌ను నిరసిస్తూ శుక్రవారం సాయంత్రం 5 గంటలకు కన్నాట్ ప్లేస్ సెంట్రల్ పార్క్ వద్ద జాతీయ జెండాతో తరలిరావాలని అభిమానులు, పౌరులకు CJP పిలుపునిచ్చింది.
మున్సిపల్, పోలీసుల ఆంక్షలు: ఈ నిరసన పిలుపు నేపథ్యంలో పరిపాలనా కారణాలను చూపుతూ అక్టోబర్ 16, 17 తేదీల్లో సెంట్రల్ పార్క్‌ను మూసివేస్తున్నట్లు NDMC నోటీసు జారీ చేసింది. మరోవైపు, కన్నాట్ ప్లేస్ నిరసనలు తెలిపేందుకు నిర్దేశించిన ప్రాంతం కాదని, ఆందోళనలు చేయాలనుకుంటే ముందస్తు అనుమతితో రాంలీలా మైదాన్ లేదా బురారీ గ్రౌండ్‌ల వద్ద నిర్వహించుకోవాలని ఢిల్లీ పోలీసులు స్పష్టం చేశారు. ముందు జాగ్రత్త చర్యగా సెంట్రల్ ఢిల్లీ వ్యాప్తంగా భారీగా పోలీసులను, పారామిలిటరీ బలగాలను మోహరించి బారికేడ్లు ఏర్పాటు చేశారు.
సీజేపీ వివరణ: పోలీసు ఆంక్షలు, చర్యలపై స్పందించిన CJP నేత అభిజీత్ దిప్కే, శాంతియుత నిరసనల వల్ల వ్యాపారాలకు ఎలాంటి నష్టం జరగదని.. ఇంటర్నెట్ నిలిపివేత, రహదారుల మూసివేత, రాకపోకల ఆంక్షల వల్లే సాధారణ ప్రజలు, వ్యాపారులు తీవ్రంగా నష్టపోతారని పేర్కొన్నారు. తమ నిరసన ఓటు హక్కు, రాజ్యాంగ స్వేచ్ఛ, ప్రజాస్వామ్య జవాబుదారీతనం పరిరక్షణ కోసమేనని ఆయన స్పష్టం చేశారు.
