సార్వత్రిక ఓటర్ల జాబితా సవరణ (SIR) వివాదం, ‘ఓటు చోరీ’ ఆరోపణలపై కేంద్ర ప్రభుత్వం మరియు ఎన్నికల సంఘం (EC)పై ప్రతిపక్ష ‘ఇండియా’ (INDIA) కూటమి తన నిరసన గళాన్ని మరింత పెంచింది. చీఫ్ ఎలక్షన్ కమిషనర్ (CEC) జ్ఞానేష్ కుమార్ రాజీనామా చేయాలని డిమాండ్ చేస్తూ, తదుపరి కార్యాచరణను ఖరారు చేసేందుకు శుక్రవారం మధ్యాహ్నం 3 గంటలకు న్యూఢిల్లీలోని సంవిధాన్ సదన్ (పాత పార్లమెంట్) సెంట్రల్ హాల్‌లో ప్రతిపక్ష ఎంపీలు అత్యవసరంగా సమావేశం కానున్నారు.
దేశాధ్యక్షురాలు ద్రౌపది ముర్ము అపాయింట్‌మెంట్ కోసం ప్రతిపక్ష నేతలు వేచి చూస్తున్నారని, ఒకవేళ రాష్ట్రపతి భవన్ నుంచి పిలుపు రాకపోతే తదుపరి నిరసన వేదికలపై కీలక నిర్ణయం తీసుకోనున్నట్లు కూటమి వర్గాలు తెలిపాయి. రాష్ట్రపతి భవన్, సేవా తీర్థ్, ఉపరాష్ట్రపతి నివాసం లేదా ప్రధానమంత్రి నరేంద్ర మోదీ, హోంమంత్రి అమిత్ షాల నివాసాల ముట్టడి వంటి ప్రత్యామ్నాయ మార్గాలను కూటమి పరిశీలిస్తోంది. ఇప్పటికే వరుసగా మూడు రోజుల పాటు ఢిల్లీ వీధుల్లో, మహాత్మా గాంధీ స్మారక స్థలి రాజ్‌ఘాట్ వద్ద రాహుల్ గాంధీ, మల్లికార్జున ఖర్గే సహా పలువురు ముఖ్య నేతలు తీవ్ర నిరసన వ్యక్తం చేసిన విషయం తెలిసిందే.
తాజాగా ఓటర్ల జాబితాల సవరణ ప్రక్రియలో ఇద్దరు ఎన్నికల కమిషనర్లు సుఖ్‌బీర్ సింగ్ సంధూ, వివేక్ జోషి కనీసం 14 సార్లు తమ వ్యతిరేకతను అధికారిక రికార్డుల్లో నమోదు చేశారన్న వార్తలు వెలువడటంతో, ప్రతిపక్షాల ఆందోళనలు మరింత ఉధృతమయ్యాయి. పరిస్థితి తీవ్రత దృష్ట్యా రాజధానిలో భద్రతను కట్టుదిట్టం చేశారు.
!["protest]("congress.jpg")
