ఆంధ్రప్రదేశ్లో జెడ్పీటీసీ, ఎంపీటీసీ ఎన్నికల నామినేషన్ల పర్వం ఉత్సాహంగా ముగిసింది. పరిషత్ ఎన్నికల్లో పోటీ చేయడానికి అన్ని ప్రధాన రాజకీయ పార్టీలు, స్వతంత్ర అభ్యర్థుల నుంచి భారీ స్పందన లభించింది. రాష్ట్రంలోని 28 జిల్లాల పరిధిలోని 659 జెడ్పీటీసీ స్థానాలకు మొత్తం 5,724 నామినేషన్లు, 9,829 ఎంపీటీసీ స్థానాలకు ఏకంగా 51,902 నామినేషన్లు దాఖలయ్యాయి. కేవలం చివరి రోజునే అత్యధికంగా జెడ్పీటీసీలకు 3,315, ఎంపీటీసీలకు 25,016 నామినేషన్లు దాఖలు కావడం విశేషం.
నామినేషన్ల దాఖలులో అధికార తెలుగుదేశం పార్టీ, ప్రతిపక్ష వైఎస్సార్సీపీ మధ్య నువ్వా నేనా అన్నట్లు తీవ్ర పోటీ నెలకొంది.
- ఎంపీటీసీ నామినేషన్లు: టీడీపీ తరఫున అత్యధికంగా 22,013, వైసీపీ నుంచి 20,556, జనసేన తరఫున 4,609, బీజేపీ నుంచి 1,150 నామినేషన్లు దాఖలయ్యాయి.
- జెడ్పీటీసీ నామినేషన్లు: టీడీపీ తరఫున 2,078, వైసీపీ నుంచి 1,815, జనసేన తరఫున 679, బీజేపీ నుంచి 255 నామినేషన్లు నమోదయ్యాయి.
జగన్పై కూటమి నేతల విమర్శలు: ఇంత భారీ సంఖ్యలో ప్రజాస్వామ్యబద్ధంగా నామినేషన్లు దాఖలవుతున్నప్పటికీ, కూటమి ప్రభుత్వంపై వైసీపీ అధినేత జగన్ మోహన్ రెడ్డి నిరాధార ఆరోపణలు చేస్తున్నారని అధికార పార్టీ నేతలు మండిపడుతున్నారు. ఆయన తీరు కేవలం ‘హిట్ అండ్ రన్’ రాజకీయాల మాదిరిగా ఉందని, క్షేత్రస్థాయి వాస్తవాలు తెలుసుకోకుండా ప్రెస్ మీట్లకే పరిమితమవుతున్నారని విమర్శించారు. నామినేషన్ల ప్రక్రియ ముగియడంతో ఏపీలో పరిషత్ ఎన్నికల రాజకీయం మరింత వేడెక్కింది.
