హైదరాబాద్ (నాంపల్లి) నుంచి న్యూఢిల్లీ మధ్య నడిచే ప్రతిష్టాత్మక ‘తెలంగాణ ఎక్స్‌ప్రెస్’ (12723/24) విజయవంతంగా 50 వసంతాలు (50 ఏళ్లు) పూర్తి చేసుకుంది. 1976 అక్టోబర్ 3న తొలిసారిగా ప్రారంభమైన ఈ సూపర్ ఫాస్ట్ ఎక్స్‌ప్రెస్ రైలు స్వర్ణోత్సవ ప్రస్థానాన్ని పురస్కరించుకుని రైలు అభిమానులు, ప్రయాణికులు కేక్ కట్ చేసి ఘనంగా సంబరాలు జరుపుకున్నారు. దక్షిణ మధ్య రైల్వే (SCR) ప్రయాణికుల నిరంతర ఆదరణకు మరియు సహకారానికి ప్రత్యేక ధన్యవాదాలు తెలిపింది.
హైదరాబాద్ డెక్కన్ నాంపల్లి నుంచి ప్రారంభమై న్యూఢిల్లీ వరకు సాగే ఈ ప్రముఖ రైలు తెలంగాణ, మహారాష్ట్ర, మధ్యప్రదేశ్, రాజస్థాన్, ఉత్తరప్రదేశ్, హర్యానా మరియు ఢిల్లీ రాష్ట్రాల గుండా మొత్తం 1,677 కిలోమీటర్ల దూరాన్ని కవర్ చేస్తుంది. ఐదు దశాబ్దాలుగా నమ్మకమైన సేవలు అందిస్తూ, దేశ రాజధానిని భాగ్యనగరంతో అనుసంధానించడంలో తెలంగాణ ఎక్స్‌ప్రెస్ అత్యంత కీలక పాత్ర పోషిస్తోంది.
