దసరా పండుగ వేళ తెలంగాణలో మద్యం ఏరులై పారింది. మందుబాబుల జోరుతో ఎక్సైజ్ ఖజానా లక్ష్మీకటాక్షంతో కళకళలాడింది. కేవలం పండుగ ముందున్న నాలుగు పనిదినాల్లోనే ఏకంగా రూ.755.14 కోట్ల విలువైన మద్యాన్ని గుటకలేయడం గమనార్హం! గతేడాది లెక్కలను సైతం తుడిచిపెట్టేస్తూ నమోదైన ఈ విక్రయాల్లో ముఖ్యంగా పండుగ ముందురోజు (అక్టోబర్ 19న) ఒక్కరోజే రూ.303.40 కోట్ల సేల్స్ జరిగి సరికొత్త రికార్డు నమోదైంది. అక్టోబర్ 14, 16, 17 తేదీల్లో కూడా వందల కోట్ల మేర అమ్మకాలు జోరుగా సాగాయి.
ఎప్పటిలాగే ఈ దసరా పండుగ సంబరాల్లో బీర్లదే పైచేయిగా నిలిచింది. ఈ నాలుగు రోజుల్లో 10.44 లక్షల కేసుల బీర్లు, 6.83 లక్షల కేసుల హార్డ్ లిక్కర్ ఖాళీ అయిపోయాయి. రాష్ట్రవ్యాప్తంగా ఉన్న 17 డిపోల ద్వారా వైన్‌షాపులు, బార్లు, పబ్బులకు నిరంతరం సరఫరా జరగడంతో ఈ నెల 19 నాటికే మొత్తం అమ్మకాల మార్జిన్ రూ.2,055 కోట్లకు చేరింది. పండుగ హడావుడి ముగిసే సరికి ఈ ఆదాయపు రికార్డులు మరెంత ఎత్తుకు చేరుకుంటాయోనని ఎక్సైజ్ శాఖ అధికారులు ఆసక్తిగా ఎదురుచూస్తున్నారు!
