బోధన్ ప్రభుత్వ ఆసుపత్రి సిబ్బందిపై ఆర్డీవోకు ఫిర్యాదు
సమగ్ర విచారణ జరిపి చర్యలు తీసుకోవాలని విజ్ఞప్తి
బోధన్, సెప్టెంబర్ 21:(E6tv NEWS: ప్రతినిధి).
బోధన్ జిల్లా ప్రభుత్వ ఆసుపత్రిలో పోస్ట్మార్టం నిర్వహించేందుకు కొంతమంది సిబ్బంది మృతుల కుటుంబ సభ్యుల వద్ద డబ్బులు డిమాండ్ చేస్తున్నారంటూ నిజామాబాద్ పార్లమెంట్ తెలుగు యువత బోధన్ నియోజకవర్గం ఇన్చార్జి ఎత్తుండ రాజేందర్ ఆర్డీవోకు ఫిర్యాదు చేశారు. ఇప్పటికే ఈ అంశంపై పత్రికల్లో వార్తలు వచ్చినప్పటికీ, ఇలాంటి ఘటనలు పునరావృతమవుతున్నాయని ఫిర్యాదులో పేర్కొన్నారు.
కుటుంబ సభ్యులను కోల్పోయి తీవ్ర విషాదంలో ఉన్న వారి వద్ద పోస్ట్మార్టం కోసం డబ్బులు అడగడం బాధాకరమని రాజేందర్ పేర్కొన్నారు. ఈ వ్యవహారంపై సమగ్ర విచారణ జరిపి, ఆరోపణలు నిజమని తేలితే బాధ్యులపై నిబంధనల ప్రకారం చర్యలు తీసుకోవాలని అధికారులను కోరారు.డబ్బులు ఫోన్పే ద్వారా చెల్లించినట్లు చూపించే స్క్రీన్షాట్ జిరాక్స్ కాపీని ఫిర్యాదుకు జత చేసినట్లు తెలిపారు. అయితే ఈ ఆరోపణలపై అధికారికంగా విచారణ జరిపి వాస్తవాలను నిర్ధారించాల్సి ఉంది.
ఆసుపత్రిలో అవగాహన ఫ్లెక్సీలు ఏర్పాటు చేయాలి
భవిష్యత్తులో ఇలాంటి ఘటనలు పునరావృతం కాకుండా ఆసుపత్రి ప్రాంగణంలో “పోస్ట్మార్టం కోసం డబ్బులు చెల్లించాల్సిన అవసరం లేదు. ఎవరైనా డబ్బులు డిమాండ్ చేస్తే ఉన్నతాధికారులకు ఫిర్యాదు చేయండి” అనే సమాచారాన్ని ఏర్పాటు చేయాలని కోరారు. అధికారుల ఫోన్ నంబర్లతో ఫ్లెక్సీలు, వాల్ రైటింగ్ లేదా నోటీసు బోర్డులు ఏర్పాటు చేస్తే ప్రజలకు అవగాహన కలుగుతుందని సూచించారు.ఈ ఫిర్యాదుపై అధికారులు విచారణ చేపట్టి ఆరోపణల్లో వాస్తవమెంత, బాధ్యులెవరనే విషయాలను వెల్లడించాల్సి ఉంది.
