తెలంగాణ ముఖ్యమంత్రి ఎ. రేవంత్ రెడ్డికి జాతీయ స్థాయిలో అరుదైన గౌరవం దక్కింది. కేరళకు చెందిన ప్రతిష్ఠాత్మక ఆర్యదాన్ ముహమ్మద్ ఫౌండేషన్ అందజేసే ‘ఆర్యదాన్ ముహమ్మద్ – 2026 బెస్ట్ పబ్లిక్ సర్వెంట్’ అవార్డుకు ఆయన ఏకగ్రీవంగా ఎంపికయ్యారు. తెలంగాణలో ప్రజాస్వామ్య విలువల పట్ల నిబద్ధతతో పాటు రైతులు, వెనుకబడిన వర్గాలు, సామాన్య ప్రజల సంక్షేమం కోసం ఆయన అమలు చేస్తున్న వినూత్న పథకాలు, దూరదృష్టి గల నాయకత్వాన్ని పరిగణనలోకి తీసుకుని ఈ పురస్కారాన్ని ప్రకటిస్తున్నట్లు ఫౌండేషన్ వర్కింగ్ చైర్మన్, నిలంబూర్ ఎమ్మెల్యే ఆర్యదాన్ షౌకత్ వెల్లడించారు.
నేడే అవార్డు ప్రదానోత్సవం:
ఈ పురస్కార ప్రదానోత్సవం శుక్రవారం సాయంత్రం 4 గంటలకు కేరళలోని నిలంబూర్లో వైభవంగా జరగనుంది. దివంగత కాంగ్రెస్ సీనియర్ నేత ఆర్యదాన్ ముహమ్మద్ 4వ వర్ధంతి సందర్భంగా ఏర్పాటు చేసిన ఈ కార్యక్రమంలో అవార్డును స్వీకరించేందుకు ముఖ్యమంత్రి రేవంత్ రెడ్డి ఇప్పటికే కేరళ చేరుకున్నారు. ఈ వేడుకలో ఏఐసీసీ ప్రధాన కార్యదర్శి కే.సీ. వేణుగోపాల్ స్మారకోపన్యాసం చేయనున్నారు. అవార్డు కింద సీఎం రేవంత్ రెడ్డికి రూ. లక్ష నగదు బహుమతి, ప్రశంసాపత్రం మరియు జ్ఞాపికను అందజేయనున్నారు.
జ్యూరీ ప్యానెల్ ఎంపిక:
కేరళ రాజకీయాల్లో 8 సార్లు ఎమ్మెల్యేగా, నాలుగు ప్రభుత్వాల్లో మంత్రిగా సేవలందించి, కార్మిక సంక్షేమం మరియు లౌకికవాద విలువలకు ప్రతీకగా నిలిచిన ఆర్యదాన్ ముహమ్మద్ పేరిట ఈ అవార్డును ఏర్పాటు చేశారు. ఎంపీ బెన్నీ బెహనన్, కేరళ రెవెన్యూ మంత్రి ఏ.పి. అనిల్ కుమార్, ప్రముఖ మేధావి కల్పెట్ట నారాయణన్లతో కూడిన ప్రత్యేక జ్యూరీ కమిటీ రేవంత్ రెడ్డిని ఈ పురస్కారానికి ఎంపిక చేసింది.
