తాళ్లరాంపూర్లో VDC దౌర్జన్యాలు మితిమీరాయి
39 మంది గౌడలు, 10 మంది దళితులను సాంఘిక బహిష్కరణ చేశారంటూ ఆరోపణ
బాధ్యులపై చట్టపరమైన చర్యలు తీసుకోవాలని డిమాండ్
నిజామాబాద్, సెప్టెంబర్ 27:(E6tv NEWS: ప్రతినిధి).
ఏర్గట్ల మండలం తాళ్లరాంపూర్ గ్రామంలో గ్రామాభివృద్ధి కమిటీ (VDC) పేరుతో దౌర్జన్యాలు కొనసాగుతున్నాయని గౌడ కులస్తులు ఆరోపించారు. తమ కులానికి చెందిన వారిని సాంఘిక బహిష్కరణకు గురిచేసినట్లు పేర్కొంటూ, ఇందుకు బాధ్యులైన VDC సభ్యులపై కఠిన చర్యలు తీసుకోవాలని డిమాండ్ చేశారు.
ఆదివారం నిజామాబాద్ ప్రెస్ క్లబ్లో గౌడ కులస్తులు మీడియా సమావేశం నిర్వహించారు. ఈ సందర్భంగా వారు మాట్లాడుతూ.. తాళ్లరాంపూర్ గ్రామంలో VDC వ్యవహారశైలి కారణంగా పలువురు తీవ్ర ఇబ్బందులు ఎదుర్కొంటున్నారని ఆరోపించారు. గ్రామంలో 39 మంది గౌడ కులస్తులను, 10 మంది దళిత కులస్తులను సాంఘిక బహిష్కరణకు గురిచేశారని వారు పేర్కొన్నారు.సాంఘిక బహిష్కరణ కారణంగా బాధిత కుటుంబాలు సామాజికంగా, ఆర్థికంగా ఇబ్బందులు ఎదుర్కొంటున్నాయని వారు తెలిపారు. గ్రామంలో ప్రతి ఒక్కరికీ రాజ్యాంగం కల్పించిన హక్కులు ఉన్నాయని, ఎవరినీ కులం పేరుతో లేదా ఇతర కారణాలతో సామాజికంగా వెలివేయడం సరికాదని అన్నారు.
VDC పేరుతో కొందరు సభ్యులు తమపై ఒత్తిడి తీసుకువస్తున్నారని, గ్రామంలో తమకు ఎదురవుతున్న సమస్యలపై అధికారులకు పలుమార్లు ఫిర్యాదు చేసినప్పటికీ ఆశించిన స్థాయిలో చర్యలు తీసుకోలేదని వారు ఆరోపించారు. సాంఘిక బహిష్కరణకు గురైన కుటుంబాల పరిస్థితిపై అధికారులు సమగ్రంగా విచారణ జరిపి వాస్తవాలను వెలుగులోకి తీసుకురావాలని కోరారు.గ్రామంలో శాంతియుత వాతావరణాన్ని నెలకొల్పడంతో పాటు బాధితులకు రక్షణ కల్పించాలని, సాంఘిక బహిష్కరణకు పాల్పడినట్లు ఆరోపణలు ఎదుర్కొంటున్న VDC సభ్యులపై విచారణ జరిపి, ఆరోపణలు నిజమని తేలితే చట్టపరమైన చర్యలు తీసుకోవాలని గౌడ కులస్తులు డిమాండ్ చేశారు.
అలాగే గ్రామంలో భవిష్యత్తులో ఇలాంటి ఘటనలు పునరావృతం కాకుండా జిల్లా యంత్రాంగం, పోలీసు అధికారులు ప్రత్యేక దృష్టి సారించాలని విజ్ఞప్తి చేశారు. బాధిత కుటుంబాలకు న్యాయం జరిగే వరకు తమ పోరాటాన్ని కొనసాగిస్తామని వారు స్పష్టం చేశారు.
