హైదరాబాద్ నగరంలో కురిసిన భారీ వర్షానికి రోడ్లన్నీ జలమయమై నాలాలు, డ్రైనేజీలు పొంగిపొర్లాయి. విటల్‌రావు నగర్ సమీపంలో రహదారిపై వరద నీరు ఉధృతంగా ప్రవహిస్తుండటంతో, రోడ్డు సరిగా కనిపించక 46 ఏళ్ల జెప్టో డెలివరీ ఎగ్జిక్యూటివ్ అర్జున్ ద్విచక్ర వాహనంతో సహా ప్రమాదవశాత్తు పక్కనే ఉన్న నాలాలో పడిపోయారు. నీటి ప్రవాహం ఎక్కువగా ఉండటంతో స్థానికులు వెంటనే పోలీసులకు సమాచారం అందించారు. సమాచారం అందుకున్న పోలీసులు, ఎన్డీఆర్‌ఎఫ్ బృందాలు సమయానుకూలంగా స్పందించి రెస్క్యూ ఆపరేషన్ చేపట్టి అర్జున్‌ను సురక్షితంగా బయటకు తీశాయి. అధికారులు, సిబ్బంది సమయస్ఫూర్తితో స్పందించడంతో పెను ప్రమాదం తప్పినట్లయింది.
ఈ ఘటనతో నగరంలో డెలివరీ ఉద్యోగుల భద్రతతో పాటు నాలాల వద్ద రక్షణ చర్యలపై మళ్లీ చర్చ మొదలైంది. ప్రతికూల వాతావరణంలో విధులు నిర్వహించే డెలివరీ బాయ్స్ భద్రతకు ప్రాధాన్యమివ్వాలని, అవసరమైనప్పుడు ప్రయాణాలు నిలిపివేసే వెసులుబాటు కల్పించాలని కోరుతున్నారు. అలాగే నగరంలో తెరిచి ఉన్న నాలాల చుట్టూ రక్షణ గోడలు, హెచ్చరిక బోర్డులు ఏర్పాటు చేయాలని, వర్షాకాలానికి ముందే పూడికతీత పనులు పూర్తి చేసి శాశ్వత పరిష్కారం చూపాలని జీహెచ్‌ఎంసీ అధికారులను స్థానికులు విజ్ఞప్తి చేస్తున్నారు. వర్షాల వేళ వాహనదారులు కూడా లోతట్టు ప్రాంతాల్లో అప్రమత్తంగా ఉండాలని పోలీసులు సూచిస్తున్నారు.
