హైదరాబాద్: దీపావళి పండగ వేళ సొంతూళ్లకు వెళ్లే ప్రయాణికులకు విమానయాన సంస్థలు కోలుకోలేని షాక్ ఇస్తున్నాయి. పండగ రద్దీతో పాటు పెరిగిన విమానయాన ఇంధన (ATF) ధరలను సాకుగా చూపిస్తూ దేశీయ, అంతర్జాతీయ మార్గాల్లో చార్జీలను ఆకాశాన్నంటేలా పెంచేశాయి. కొన్ని ప్రధాన రూట్లలో టికెట్ ధరలు సాధారణ రోజులతో పోలిస్తే ఏకంగా 300 శాతం వరకు పెరగడంతో పండగ ప్రయాణం సామాన్యులకు తీవ్ర భారంగా మారింది. ఉదాహరణకు ఢిల్లీ-బెంగళూరు మార్గంలో రౌండ్-ట్రిప్ చార్జీలు రూ. 20,000 దాటగా, కోల్కతా-దేవ్గఢ్ రూట్లో సాధారణంగా రూ. 2,800 ఉండే టికెట్ ధర ఏకంగా రూ. 12,500కి చేరింది. దేశీయంగానే కాకుండా అంతర్జాతీయంగా దుబాయ్, అబుదాబి, షార్జాల నుంచి భారత్కు వచ్చే విమాన టికెట్ ధరలు కూడా రూ. 26,000 నుంచి రూ. 32,000 వరకు పలుకుతున్నాయి.
ఈ చార్జీల భారాణికి ప్రధానంగా ఏవియేషన్ టర్బైన్ ఫ్యూయల్ (ATF) ధరలు పెరగడమే కారణమని నిపుణులు విశ్లేషిస్తున్నారు. ఈ ఏడాది సెప్టెంబర్లోనే లీటర్ ఇంధనంపై రూ. 6.28 పెరిగి రూ. 121.28కి చేరింది. దీనికి తోడు అంతర్జాతీయంగా భౌగోళిక రాజకీయ ఉద్రిక్తతల వల్ల ముడి చమురు ధరలు పెరగడం, పండగ సీజన్లో టికెట్లకు ఉండే అధిక డిమాండ్ను ఎయిర్లైన్స్ కంపెనీలు అనుకూలంగా మార్చుకోవడంతో ధరలు విపరీతంగా పెరిగాయి. సొంతూళ్లకు వెళ్లాలంటే పండగ బడ్జెట్ మొత్తం విమాన టికెట్లకే సరిపోతోందని ప్రయాణికులు సోషల్ మీడియా వేదికగా తీవ్ర ఆవేదన వ్యక్తం చేస్తున్నారు. ఈ క్రమంలో చార్జీల భారం తగ్గించుకోవడానికి ప్రయాణికులు ముందస్తుగా ప్రయాణాలు ప్లాన్ చేసుకోవడం, వారం మధ్య రోజుల్లో ప్రయాణించడం లేదా ప్రత్యామ్నాయంగా రైలు మార్గాలను ఎంచుకోవడం మంచిదని ట్రావెల్ ప్లాట్ఫామ్లు సూచిస్తున్నాయి.
