25 ఎకరాల్లో త్వరలో ఇళ్ల పట్టాల పంపిణీ – మహాదేవపల్లిలో రూ.45 లక్షలతో అభివృద్ధి పనులకు భూమిపూజ
పెనుకొండ, సెప్టెంబర్ 27:(E6tv NEWS: ప్రతినిధి)
ప్రజల వద్దకే పాలనను తీసుకెళ్లి అభివృద్ధి, సంక్షేమానికి అత్యంత ప్రాధాన్యం ఇస్తున్నామని బీసీ సంక్షేమ, చేనేత జౌళి శాఖల మంత్రి సవిత అన్నారు. ప్రజలతోనే కూటమి ప్రభుత్వం.. ప్రజల కోసమే పాలన సాగుతోందని తెలిపారు. ప్రతి కుటుంబానికి సంక్షేమం, ప్రతి గ్రామానికి అభివృద్ధి లక్ష్యంగా ప్రభుత్వం పనిచేస్తోందన్నారు.
పెనుకొండ మున్సిపాలిటీ పరిధిలోని 20వ వార్డు షీఫారం, మహాదేవపల్లిలో మంత్రి సవిత పర్యటించారు. ఈ సందర్భంగా ఇంటింటికీ వెళ్లి ప్రభుత్వ అభివృద్ధి, సంక్షేమ కార్యక్రమాలను ప్రజలకు వివరించారు. వివిధ పథకాల లబ్ధిదారులతో మాట్లాడి పథకాల అమలు తీరును అడిగి తెలుసుకున్నారు. ప్రజలు ఎదుర్కొంటున్న సమస్యలను తెలుసుకుని వాటి పరిష్కారానికి చర్యలు తీసుకుంటామని హామీ ఇచ్చారు.
హింసను ప్రేరేపించడం మా విధానం కాదు
గత రెండున్నరేళ్లుగా ప్రజల వద్దకే పాలనను తీసుకెళ్లి సమస్యలను ప్రత్యక్షంగా తెలుసుకుని పరిష్కరించేందుకు చర్యలు తీసుకుంటున్నామని మంత్రి తెలిపారు. ప్రజాస్వామ్యబద్ధంగా పాలన సాగిస్తున్నామని, ఎన్నికల సమయంలో ప్రజలను ఓట్లు అడుగుతామని స్పష్టం చేశారు.గత ప్రభుత్వ హయాంలో జరిగినట్లు చెబుతున్న అవినీతి, అక్రమాలకు సంబంధించి చట్టం తన పని తాను చేసుకుపోతోందన్నారు. ఎవరూ చట్టాన్ని తమ చేతుల్లోకి తీసుకోరాదని, చట్టపరమైన ప్రక్రియ కొనసాగుతుందని పేర్కొన్నారు. కూటమి ప్రభుత్వం ప్రజలను రెచ్చగొట్టే విధంగా వ్యవహరించడం లేదని, నాయకులు, కార్యకర్తలను హింసకు ప్రేరేపించడం తమ విధానం కాదని స్పష్టం చేశారు.
రూ.20 కోట్లతో అభివృద్ధి పనులు
పెనుకొండ మున్సిపాలిటీ పరిధిలో సుమారు రూ.20 కోట్లతో వివిధ అభివృద్ధి పనులు చేపడుతున్నామని మంత్రి సవిత తెలిపారు. మహాదేవపల్లిలో సుమారు రూ.45 లక్షలతో చేపట్టనున్న అభివృద్ధి పనులకు త్వరలో భూమిపూజ నిర్వహిస్తామని చెప్పారు. గ్రామంలో మౌలిక వసతుల అభివృద్ధికి ప్రాధాన్యం ఇస్తున్నామన్నారు.మహాదేవపల్లి బ్రిడ్జి సమస్యను త్వరలో పరిష్కరించి నిర్మాణాన్ని పూర్తి చేసేందుకు చర్యలు తీసుకుంటామని హామీ ఇచ్చారు. పలువురు లబ్ధిదారులకు ఇంటి పొజిషన్ పత్రాలను మంత్రి అందజేశారు.
25 ఎకరాల్లో ఇళ్ల పట్టాల పంపిణీ
షీఫారం వద్ద సుమారు 25 ఎకరాల్లో అర్హులైన పేదలకు హౌసింగ్ పట్టాలు అందజేసే కార్యక్రమాన్ని చేపడుతున్నామని మంత్రి తెలిపారు. పేదలకు ఇళ్ల స్థలాలు, గృహ వసతి కల్పించేందుకు ప్రభుత్వం చర్యలు తీసుకుంటోందన్నారు.అమృత్-2 పథకం కింద మున్సిపాలిటీలో సుమారు రూ.100 కోట్లతో ఇంటింటికీ మినరల్ వాటర్ అందించే కార్యక్రమాన్ని చేపడుతున్నామని తెలిపారు.
కియా పరిశ్రమతో ఉపాధి అవకాశాలు
కియా పరిశ్రమ కారణంగా ప్రత్యక్షంగా, పరోక్షంగా పెద్ద సంఖ్యలో ఉపాధి అవకాశాలు లభిస్తున్నాయని మంత్రి సవిత తెలిపారు. పరిశ్రమల అభివృద్ధితో స్థానికంగా ఉపాధి అవకాశాలు పెరగడంతో ప్రజల ఆర్థిక పరిస్థితులు మెరుగుపడే అవకాశం ఉందన్నారు.విద్యార్థుల తల్లిదండ్రులకు అండగా ‘తల్లికి వందనం’, మహిళలకు ఉచిత బస్సు ప్రయాణం వంటి పలు సంక్షేమ కార్యక్రమాలను ప్రభుత్వం అమలు చేస్తోందన్నారు. అభివృద్ధి, సంక్షేమాన్ని సమన్వయం చేస్తూ ప్రజల జీవన ప్రమాణాలను మెరుగుపరచడమే ప్రభుత్వ లక్ష్యమని మంత్రి స్పష్టం చేశారు.ఈ కార్యక్రమంలో అధికారులు, కూటమి నాయకులు, కార్యకర్తలు, స్థానిక ప్రజలు తదితరులు పాల్గొన్నారు.
