ప్రపంచ ప్రసిద్ధి గాంచిన బాలాపూర్ గణనాథుడి శోభాయాత్ర మరియు అత్యంత ప్రతిష్ఠాత్మకమైన లడ్డూ వేలం పాట ప్రారంభంలో కాస్త జాప్యం చోటుచేసుకుంటోంది. బాలాపూర్ గణేష్ విగ్రహాన్ని మండపం నుంచి వెలుపలికి తీసి భారీ ట్రక్కుపై సురక్షితంగా ప్రతిష్ఠించే క్రమంలో సాంకేతిక ఇబ్బందులు ఎదురుకావడంతో, క్రేన్ మరియు పోలీసు సిబ్బంది తీవ్రంగా శ్రమిస్తున్నారు. విగ్రహాన్ని ట్రక్కుపై భద్రంగా కుదుర్చిన తర్వాతే ఊరేగింపు ప్రారంభం కానుంది.
గ్రామంలో మిన్నంటిన ఆధ్యాత్మిక కోలాహలం: మరోవైపు శోభాయాత్ర ఆలస్యమవుతున్నప్పటికీ బాలాపూర్ గ్రామంలో పండుగ వాతావరణం అంబరాన్నంటింది. ఉదయం నుంచే భక్తులు కోలాటాలు, భజనలు, అన్నమయ్య సంకీర్తనలతో మార్మోగిస్తున్నారు. వీధులన్నీ భక్తజన సందోహంతో కిక్కిరిసిపోయాయి.
శోభాయాత్ర తర్వాతే లడ్డూ వేలం పాట: విగ్రహాన్ని ట్రాన్స్పోర్టర్పై అమర్చిన అనంతరం శోభాయాత్ర మొదలవుతుందని, ఆ తర్వాతే నగరవ్యాప్తంగా ఎంతో ఉత్కంఠగా ఎదురుచూస్తున్న బాలాపూర్ లడ్డూ వేలం పాట కార్యక్రమాన్ని నిర్వహించనున్నట్లు నిర్వాహకులు తెలిపారు.
