గీత కార్మికుల సంక్షేమం, సంఘ భవనం, యువతకు విద్యా–ఉద్యోగ అవకాశాలే లక్ష్యాలు
ఉంగరం గుర్తుకు ఓటు వేయాలని విజ్ఞప్తి
రుద్రూర్,సెప్టెంబర్ 21:(E6tv NEWS: ప్రతినిధి).
రుద్రూర్ గౌడ సంఘం ఎన్నికలు–2026లో అధ్యక్ష పదవికి మీసాల గోవింద్ గౌడ్ పోటీ చేస్తున్నారు. గౌడ సమాజ అభివృద్ధి, గీత కార్మికుల సంక్షేమం, విద్యార్థులు, యువతకు ప్రోత్సాహం, పేద కుటుంబాలకు సహాయం, సంఘానికి సొంత భవనం నిర్మాణం వంటి అంశాలను తన ప్రచారంలో ప్రధానంగా ప్రస్తావించారు.తనకు అవకాశం కల్పిస్తే రుద్రూర్ మండలంలోని వివిధ గ్రామాలకు చెందిన గౌడ సోదరులను కలుపుకొని సంఘ అభివృద్ధికి కృషి చేస్తానని గోవింద్ గౌడ్ తెలిపారు. నంద్యాల, బోధన్ ప్రాంతాల్లోని గౌడ సోదరులతోనూ సమన్వయం చేసుకుంటూ ఐక్యతను పెంపొందించేందుకు కృషి చేస్తానని పేర్కొన్నారు.
గీత కార్మికుల సంక్షేమానికి ప్రాధాన్యం
గీత కార్మికులు చెట్టు ఎక్కే సమయంలో ప్రమాదానికి గురైతే ప్రభుత్వం నుంచి రూ.10 లక్షల ఎక్స్గ్రేషియా అందేలా కృషి చేస్తానని తెలిపారు. ప్రతి గీత కార్మికుడికి గీత బీమా, పెన్షన్ సౌకర్యాలు అందేలా సంబంధిత అధికారుల దృష్టికి సమస్యలను తీసుకెళ్తానని పేర్కొన్నారు.
సంఘానికి సొంత భవనం
రుద్రూర్లో గౌడ సంఘానికి సొంత భవనం నిర్మాణాన్ని పూర్తి చేసేందుకు కృషి చేస్తానని తెలిపారు. పేద గౌడ కుటుంబాల వివాహ కార్యక్రమాలకు సంఘ భవనాన్ని ఉచితంగా వినియోగించుకునేలా చర్యలు తీసుకుంటానని పేర్కొన్నారు.
విద్యార్థులు, యువతకు ప్రోత్సాహం
ప్రతి సంవత్సరం పదో తరగతి, ఇంటర్మీడియట్లో ప్రతిభ కనబరిచే విద్యార్థులను సన్మానించి నగదు ప్రోత్సాహకాలు అందించేలా కార్యక్రమాలు చేపడతానని తెలిపారు. పోలీస్, ఆర్మీ వంటి ఉద్యోగాలకు సిద్ధమయ్యే గౌడ యువతకు ఉచిత కోచింగ్ అందించేలా కృషి చేస్తానని పేర్కొన్నారు.
సభ్యుల కుటుంబాలకు ఆర్థిక సహాయం
సంఘ సభ్యుడు ఎవరైనా మృతి చెందితే వారి కుటుంబానికి రూ.10 వేల ఆర్థిక సహాయం అందించే కార్యక్రమాన్ని చేపడతామని ప్రచారంలో తెలిపారు. పేద కుటుంబాలకు అవసరమైన సమయంలో సంఘం తరఫున సహకారం అందించేందుకు చర్యలు తీసుకుంటానని పేర్కొన్నారు.
52 ఏళ్లుగా గీతవృత్తిలో అనుభవం
మీసాల గోవింద్ గౌడ్ 1974 నుంచి సుమారు 52 సంవత్సరాలుగా గీతవృత్తిలో కొనసాగుతున్నట్లు తన ప్రచార సమాచారంలో పేర్కొన్నారు. గీతవృత్తిలో తనకు ఉన్న అనుభవంతో పలువురు గౌడ సోదరులకు వృత్తిలో శిక్షణ ఇచ్చి, ఉపాధి పొందేందుకు సహకరించినట్లు తెలిపారు.కుటుంబంతో పాటు సమాజ అభివృద్ధికి కూడా ప్రాధాన్యం ఇస్తానని, గౌడ యువతకు విద్య, ఉపాధి అవకాశాలు కల్పించే దిశగా తన వంతు కృషి చేస్తానని పేర్కొన్నారు.
“కక్షలు వద్దు.. కుల అభివృద్ధి ముద్దు”
గౌడ సమాజంలో విభేదాలకు తావులేకుండా అందరినీ కలుపుకొని ముందుకు సాగాలన్నదే తన ఉద్దేశమని గోవింద్ గౌడ్ తెలిపారు. “ఐక్యతే సంఘానికి బలం.. అభివృద్ధే సంఘ ప్రగతికి మార్గం” అనే నినాదంతో సేవా కార్యక్రమాలకు ప్రాధాన్యం ఇస్తానని పేర్కొన్నారు.రుద్రూర్ గౌడ సంఘం అధ్యక్ష ఎన్నికల్లో ఉంగరం గుర్తుకు ఓటు వేసి తనకు అవకాశం కల్పించాలని మీసాల గోవింద్ గౌడ్ గౌడ సోదరులు, పెద్దలు, యువతను కోరారు. అందరి సహకారంతో సంఘ అభివృద్ధికి కృషి చేస్తానని తెలిపారు.
