నవంబర్ 1 నాటి నుంచి దేశవ్యాప్తంగా సామాన్యులు, పెన్షనర్లు, వ్యాపారులకు వర్తించే పలు కీలక ఆర్థిక నిబంధనల్లో మార్పులు చోటుచేసుకోనున్నాయి. కేంద్ర ప్రభుత్వ పెన్షన్ పొందే 80 ఏళ్లలోపు అర్హులైన లబ్ధిదారులు తమ వార్షిక లైఫ్ సర్టిఫికెట్ (జీవన్ ప్రమాణ్) సమర్పించే ప్రక్రియ నవంబర్ 1 నుంచి ప్రారంభమై నవంబర్ 30తో ముగియనుంది. పన్ను చెల్లింపుదారులకు ఊరటనిస్తూ, ఆడిట్ వర్తించే నిర్దిష్ట విభాగానికి 2026-27 అసెస్‌మెంట్ ఇయర్ ఐటీఆర్ దాఖలు గడువును అక్టోబర్ 31 నుంచి నవంబర్ 21 వరకు సీబీడీటీ పొడిగించింది. అలాగే వ్యాపార ప్రక్రియలను సులభతరం చేసేలా జీఎస్టీ డిస్కౌంట్లు, ఇన్‌వర్టెడ్ డ్యూటీ రిఫండ్‌ల చెల్లింపును వేగవంతం చేసే కొత్త జీఎస్టీ సవరణలు కూడా నవంబర్ 1 నుంచి అమలులోకి రానున్నాయి.
మరోవైపు ప్రతి నెలా మొదటి తేదీన చమురు మార్కెటింగ్ కంపెనీలు చేపడే సమీక్షలో భాగంగా గృహ మరియు వాణిజ్య ఎల్‌పీజీ సిలిండర్ల ధరల్లో మార్పులు ఉండవచ్చని వినియోగదారులు ఆసక్తిగా ఎదురుచూస్తున్నారు. ఇక వికలాంగుల పెన్షన్ నిబంధనల సవరణలకు కేంద్ర కేబినెట్ ఆమోదం తెలిపినప్పటికీ, వాటి అమలుపై మార్గదర్శకాలు రావాల్సి ఉంది. పెన్షనర్లు, పన్ను చెల్లింపుదారులు నవంబర్ గడువులను గమనించి ఆర్థిక ఇబ్బందులు తలెత్తకుండా సమయానికి పూర్తి చేసుకోవాలని నిపుణులు సూచిస్తున్నారు.
