సైబరాబాద్ కమిషనరేట్ పరిధిలో వినాయక చవితి ఉత్సవాలు అత్యంత వైభవంగా కొనసాగుతున్నాయి. నవరాత్రుల సందర్భంగా ఇప్పటివరకు సైబరాబాద్ వ్యాప్తంగా 1,19,667 గణనాథుల విగ్రహాలు విజయవంతంగా నిమజ్జనమయ్యాయి. నిమజ్జన కార్యక్రమాలతో పాటు పర్యావరణ పరిరక్షణకు ప్రాధాన్యతనిస్తూ సైబరాబాద్ మున్సిపల్ కార్పొరేషన్ (CMC) ప్రత్యేక చర్యలు చేపట్టింది.
నిమజ్జన ఘాట్ల వద్ద పూల వ్యర్థాలను వేరుగా సేకరిస్తున్న అధికారులు, గత 11 రోజుల్లో సుమారు 6,000 కిలోల పూల వ్యర్థాలను సేకరించినట్లు వెల్లడించారు. ఈ పూలను వేరుచేసి, ఎండబెట్టి అగరబత్తులు, ధూప్ స్టిక్స్, ప్రమిదలు (దియాలు) వంటి ఉపయోగకరమైన వస్తువులుగా పునరుత్పత్తి (రీసైక్లింగ్) చేస్తున్నారు. ఇంకా అనేక ప్రాంతాల నుంచి విగ్రహాల నిమజ్జనం కొనసాగుతుండటంతో, శని, ఆదివారాల్లో కూడా నిమజ్జన ఘాట్ల వద్ద మున్సిపల్ సిబ్బంది ఈ వ్యర్థాల సేకరణ ప్రక్రియను కొనసాగించనున్నారు.
