తెలుగు రాష్ట్రాల్లోనే కాకుండా దేశవ్యాప్తంగా ఎంతో ఆసక్తి రేకెత్తించే బాలాపూర్ గణేష్ లడ్డూ వేలం పాట ఈసారి కూడా తీవ్ర ఉత్కంఠభరితంగా ముగిసింది. కోట్లాది మంది భక్తులు ఎప్పుడెప్పుడా అని ఎదురుచూసిన ఈ వేలంలో ఊహించని రీతిలో పోటీ నెలకొంది. తీవ్ర హోరాహోరీ నడుమ సాగిన ఈ పాటలో అర్బన్ గ్రూప్ కంపెనీస్ చైర్మన్ సామ ప్రణీత్ రెడ్డి (Sama Praneet Reddy) ఏకంగా రూ. 39 లక్షలకు లడ్డూను పాడి సరికొత్త రికార్డు సృష్టించారు. గతేడాది (2025)లో లింగాల దశరథ్ గౌడ్ రూ. 35 లక్షలకు దక్కించుకోగా, ఈసారి ఆ రికార్డును తిరగరాస్తూ ఏకంగా రూ. 4 లక్షలు అదనంగా పలికింది.
9 మంది మధ్య హోరాహోరీ పోటీ: ఈ ప్రతిష్ఠాత్మక వేలంలో పాల్గొనేందుకు మొత్తం 9 మంది ప్రముఖులు, స్థానిక భక్తులు పోటీపడ్డారు. ఒకరిని మించి మరొకరు బిడ్లు పెంచుకుంటూ పోవడంతో బాలాపూర్ ప్రాంగణంలో ఉత్కంఠ తారాస్థాయికి చేరింది. చివరికి సామ ప్రణీత్ రెడ్డి రూ. 39 లక్షలతో అత్యధిక బిడ్ను పలికి స్వామివారి దివ్య ప్రసాదాన్ని స్వంతం చేసుకున్నారు. లడ్డూను దక్కించుకున్న ఆయనను ఉత్సవ సమితి సభ్యులు, ప్రజాప్రతినిధులు, తోటి భక్తులు ఘనంగా సత్కరించి అభినందనలు తెలిపారు.
1994లో రూ. 450 నుంచి నేడు రూ. 39 లక్షల వరకు: బాలాపూర్ లడ్డూ వేలానికి సుదీర్ఘమైన, విశిష్టమైన చరిత్ర ఉంది. 1994లో కేవలం రూ. 450లతో ప్రారంభమైన ఈ వేలం పాట ప్రస్థానం నేడు రూ. 39 లక్షల శిఖరానికి చేరింది. ఈ ప్రసాదాన్ని దక్కించుకుంటే ఆయురారోగ్యాలు, అష్టఐశ్వర్యాలు, వ్యాపార అభివృద్ధి కలుగుతాయని భక్తుల బలమైన విశ్వాసం.
