కాళేశ్వరం ప్రాజెక్టు నిర్మాణంపై బీఆర్ఎస్ ప్రభుత్వాన్ని విమర్శించిన బ్లాక్ కాంగ్రెస్ నాయకుడు ఇందూరు చంద్రశేఖర్
రైతులను, ప్రజలను తప్పుదోవ పట్టించొద్దని బీఆర్ఎస్ నాయకులకు హితవు
రుద్రూర్, నవంబర్ 17: (E6tv NEWS).
ప్రజాధనంతో నిర్మించే ప్రాజెక్టులు తరతరాలకు ఉపయోగపడేలా ఉండాలని, పాలకుల ప్రచారానికి, రాజకీయ ప్రయోజనాలకు పరిమితం కాకూడదని బ్లాక్ కాంగ్రెస్ నాయకుడు ఇందూరు చంద్రశేఖర్ అన్నారు. కాంగ్రెస్ ప్రభుత్వ హయాంలో నిర్మించిన ప్రాజెక్టులు నేటికీ పటిష్టంగా నిలిచి ప్రజలకు, రైతులకు సేవలందిస్తున్నాయని పేర్కొన్నారు. గత బీఆర్ఎస్ ప్రభుత్వ హయాంలో నిర్మించిన కాళేశ్వరం ప్రాజెక్టులో కొద్దికాలానికే కుంగుబాటు సమస్యలు తలెత్తడం నిర్మాణ నాణ్యతపై అనేక ప్రశ్నలను లేవనెత్తుతోందని విమర్శించారు.ప్రాజెక్టుల నిర్మాణం పేరుతో లక్షల కోట్ల రూపాయలు ఖర్చు చేసి రాష్ట్రంపై భారీ అప్పుల భారం మోపారని, ప్రజాధనం వినియోగంపై గత పాలకులు సమాధానం చెప్పాలని డిమాండ్ చేశారు. ప్రాజెక్టుల నిర్మాణంలో నాణ్యత, పారదర్శకత, ప్రజాప్రయోజనాలే ప్రాధాన్యంగా ఉండాలని సూచించారు.
ఎమ్మెల్యేలపై వ్యక్తిగత విమర్శలు తగవు
బీఆర్ఎస్ నాయకులు కాంగ్రెస్ నాయకులతో పాటు బాన్సువాడ ఎమ్మెల్యే పోచారం శ్రీనివాస్ రెడ్డి, బోధన్ ఎమ్మెల్యే సుదర్శన్ రెడ్డిపై అనుచిత వ్యాఖ్యలు చేయడం సరికాదని చంద్రశేఖర్ అన్నారు. ప్రజలు, రైతుల సమస్యల పరిష్కారానికి ప్రజాప్రతినిధులు కృషి చేస్తున్నారని పేర్కొన్నారు. రాజకీయ విమర్శలకు హద్దులు ఉండాలని, వ్యక్తిగత ఆరోపణలు చేయడం మానుకోవాలని హితవు పలికారు.
తాగునీటి అవసరాల కోసమే నీటి నిల్వల పరిరక్షణ
ఎల్నినో ప్రభావంతో భవిష్యత్తులో నీటి కొరత ఏర్పడే అవకాశం ఉన్నందున ముందస్తు జాగ్రత్తలు తీసుకోవడం ప్రభుత్వ బాధ్యత అని అన్నారు. నిజాంసాగర్ ప్రాజెక్టులో ప్రస్తుతం 9 నుంచి 10 టీఎంసీల నీరు ఉన్నప్పటికీ, ఆ నీటిని కేవలం సాగునీటి అవసరాలకే కాకుండా ప్రజల తాగునీటి అవసరాలను కూడా దృష్టిలో ఉంచుకొని వినియోగించాల్సి ఉంటుందని వివరించారు.రబీ సీజన్లో వరి సాగుపై ప్రభుత్వం చేస్తున్న సూచనల వెనుక భవిష్యత్తు నీటి అవసరాలను దృష్టిలో ఉంచుకున్న ముందుచూపు ఉందని పేర్కొన్నారు. తాగునీటి అవసరాలను విస్మరించి నీటిని పూర్తిగా సాగుకు వినియోగిస్తే భవిష్యత్తులో ప్రజలు ఇబ్బందులు ఎదుర్కొనే ప్రమాదం ఉందన్నారు. వాస్తవ పరిస్థితులను అర్థం చేసుకోకుండా బీఆర్ఎస్ నాయకులు రైతులను తప్పుదోవ పట్టించవద్దని సూచించారు.
రైతుల సంక్షేమానికి కాంగ్రెస్ ప్రభుత్వం కట్టుబడి ఉంది
రైతుల సమస్యల పరిష్కారానికి కాంగ్రెస్ ప్రభుత్వం కృషి చేస్తోందని చంద్రశేఖర్ తెలిపారు. నవంబర్ 5న ముఖ్యమంత్రి రేవంత్ రెడ్డి, వ్యవసాయ శాఖ మంత్రి, ఇతర ముఖ్య నాయకులతో సమావేశమై రైతుల సమస్యలు, వ్యవసాయ రంగానికి సంబంధించిన అంశాలపై చర్చించిన విషయాన్ని గుర్తుచేశారు. రైతులకు మేలు చేయాలనే లక్ష్యంతో ప్రభుత్వం ముందుకు సాగుతోందని పేర్కొన్నారు.ఈ సందర్భంగా మండల కాంగ్రెస్ అధ్యక్షుడు తోట అరుణ్ కుమార్, ఎలమంచిలి శ్రీనివాసరావు మాట్లాడుతూ ఎమ్మెల్యే పోచారం శ్రీనివాస్ రెడ్డి, ఎమ్మెల్యే సుదర్శన్ రెడ్డిపై బీఆర్ఎస్ నాయకులు తప్పుడు వ్యాఖ్యలు చేయడం మానుకోవాలని అన్నారు. కాంగ్రెస్ పార్టీపై నిరాధార ఆరోపణలు చేస్తే తగిన రీతిలో సమాధానం చెబుతామని హెచ్చరించారు.
ఈ కార్యక్రమంలో ఉపసర్పంచ్ నిస్సార్, వార్డు సభ్యుడు ఆమంద్ వెంకటేష్, నాయకులు కర్క అశోక్, పత్తి రాము, పార్వతి ప్రవీణ్, మాజీ ఎంపీటీసీ గౌస్, రాయకూర్ సర్పంచ్ గంగారాం, అనిల్ పటేల్, సుదర్శన్ గౌడ్, చిక్కడపల్లి రవి, బర్ల చిట్టి, గాండ్ల శ్రీను, కాంగ్రెస్ పార్టీ నాయకులు, కార్యకర్తలు తదితరులు పాల్గొన్నారు.

