చిన్నారుల ఆసుపత్రుల్లో భద్రతా ప్రమాణాలపై ప్రత్యేక దృష్టి

రిమ్స్ ఘటన నేపథ్యంలో ప్రభుత్వ, ప్రైవేట్ ఆసుపత్రుల ప్రతినిధులతో సమీక్ష

ఫైర్ సేఫ్టీ, అత్యవసర నిష్క్రమణ మార్గాలు, విద్యుత్ భద్రతపై అధికారుల దృష్టి

మాక్ డ్రిల్స్ నిర్వహించి అత్యవసర పరిస్థితులను ఎదుర్కొనేలా సిబ్బందికి శిక్షణ ఇవ్వాలని సూచన

నిజామాబాద్, సెప్టెంబర్ 24:(E6tv NEWS: శివ ఠాకూర్).

ఆదిలాబాద్ జిల్లా రిమ్స్ ఆసుపత్రిలో చోటుచేసుకున్న సంఘటన నేపథ్యంలో నిజామాబాద్ జిల్లాలో చిన్నారులకు వైద్య సేవలు అందిస్తున్న ప్రభుత్వ, ప్రైవేట్ ఆసుపత్రుల్లో భద్రతా ప్రమాణాలపై ప్రత్యేక దృష్టి సారించారు. ఈ మేరకు పోలీస్ కమిషనర్ పి. సాయి చైతన్య, ఐపీఎస్., జిల్లా వైద్య ఆరోగ్య శాఖ అధికారి డీఎం అండ్ హెచ్‌ఓ బి. రాజశ్రీ ఆధ్వర్యంలో ఆసుపత్రుల ప్రతినిధులతో గురువారం కమాండ్ కంట్రోల్ హాల్‌లో ప్రత్యేక సమీక్ష సమావేశం నిర్వహించారు.

ఈ సమావేశానికి ప్రభుత్వ, ప్రైవేట్ ఆసుపత్రుల నిర్వాహకులు, వైద్యులు, సంబంధిత శాఖల అధికారులు హాజరయ్యారు. చిన్నారుల భద్రత, అత్యవసర పరిస్థితుల్లో చేపట్టాల్సిన చర్యలు, అగ్ని ప్రమాదాల నివారణకు తీసుకోవాల్సిన ముందస్తు జాగ్రత్తలపై అధికారులు సమగ్రంగా చర్చించారు.

ఫైర్ సేఫ్టీపై సమగ్ర సమీక్ష

ఆసుపత్రుల్లో అందుబాటులో ఉన్న అగ్నిమాపక పరికరాలు, వాటి పనితీరు, ఫైర్ అలారం వ్యవస్థ, అత్యవసర నిష్క్రమణ మార్గాలు, విద్యుత్ భద్రత తదితర అంశాలను పరిశీలించాలని సూచించారు. అగ్ని ప్రమాదం వంటి అత్యవసర పరిస్థితుల్లో రోగులను సురక్షితంగా తరలించే విధానంపై ఆసుపత్రి సిబ్బందికి అవగాహన కల్పించాలన్నారు.

మాక్ డ్రిల్స్ నిర్వహించాలి

చిన్నారులు చికిత్స పొందుతున్న ప్రాంతాల్లో ఎలాంటి అవాంఛనీయ సంఘటనలు చోటుచేసుకోకుండా ఆసుపత్రుల యాజమాన్యాలు ముందస్తు భద్రతా చర్యలను తప్పనిసరిగా పాటించాలని అధికారులు సూచించారు. పోలీస్, ఫైర్ సర్వీసెస్, వైద్య సిబ్బంది సమన్వయంతో అత్యవసర పరిస్థితులను ఎదుర్కొనేలా క్రమం తప్పకుండా మాక్ డ్రిల్స్ నిర్వహించాలని పేర్కొన్నారు.భద్రతా ప్రమాణాల అమలులో ఎలాంటి నిర్లక్ష్యానికి తావు లేకుండా సంబంధిత అధికారులు ఎప్పటికప్పుడు పర్యవేక్షించాలని, లోపాలు గుర్తించిన వెంటనే వాటిని సరిదిద్దే చర్యలు చేపట్టాలని సమావేశంలో సూచించారు.చిన్నారులు, వారి తల్లిదండ్రులు, ఆసుపత్రికి వచ్చే ప్రజలకు సురక్షితమైన వాతావరణం కల్పించడమే ప్రధాన లక్ష్యంగా ప్రభుత్వ, ప్రైవేట్ ఆసుపత్రుల యాజమాన్యాలు పోలీస్, వైద్య ఆరోగ్య శాఖ, ఫైర్ సర్వీసెస్ అధికారులతో సమన్వయంతో పనిచేయాలని పోలీస్ కమిషనర్ పి. సాయి చైతన్య సూచించారు.

అధికారులు, వైద్యుల పాల్గొనడం

సమావేశంలో అదనపు డీసీపీ అడ్మిన్ ఎన్. శుభం ప్రకాష్, డీఎం అండ్ హెచ్‌ఓ బి. రాజశ్రీ, జిల్లా ఫైర్ అధికారి టి. పరమేశ్వర్, ఎన్‌ఎస్‌సీ ప్రెసిడెంట్ డాక్టర్ కవిత రెడ్డి, డీసీహెచ్ఎస్ డాక్టర్ శ్రీనివాస ప్రసాద్, ఐఎంఏ ప్రెసిడెంట్ డాక్టర్ విశాల్, ఎలక్ట్రిసిటీ ఎస్‌ఈ పి.వి. రాజేశ్వర్ రావు, నిజామాబాద్, ఆర్మూర్, బోధన్, ట్రాఫిక్, సీసీఆర్‌బీ, ఏసీపీ అధికారులు ప్రకాష్, వెంకటేశ్వర రెడ్డి, శ్రీనివాస్, మస్తాన్ అలీ, గురు నాయుడు, స్పెషల్ బ్రాంచ్ ఇన్‌స్పెక్టర్లు శ్రీధర్ రెడ్డి, మల్లేశం, జిల్లాలోని చిన్నారుల వైద్యులు తదితరులు పాల్గొన్నారు.