సంక్షేమ హాస్టళ్లకు ‘మహర్దశ’.. మహిళల భద్రతే మా ప్రాధాన్యత: అధికారులకు సీఎం చంద్రబాబు కీలక ఆదేశాలు!

సంక్షేమ హాస్టళ్లకు ‘మహర్దశ’.. మహిళల భద్రతే మా ప్రాధాన్యత: అధికారులకు సీఎం చంద్రబాబు కీలక ఆదేశాలు!
అమరావతి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు వివిధ శాఖల పనితీరుపై సోమవారం సచివాలయంలోని ఆర్టీజీఎస్ (RTGS) కేంద్రం నుంచి కీలక సమీక్ష నిర్వహించారు. రాష్ట్రంలో పాలనను గాడిలో పెట్టడమే లక్ష్యంగా అధికారులకు దిశానిర్దేశం చేశారు. ప్రధానంగా విద్యా సంస్థల పునఃప్రారంభం, మహిళా భద్రత, అన్న క్యాంటీన్ల నిర్వహణపై సీఎం స్పష్టమైన ఆదేశాలు జారీ చేశారు.
జూన్ నాటికి హాస్టళ్లు ‘చక్కదిద్దాలి’
స్కూళ్లు రీ-ఓపెన్ అయ్యే సమయానికి ప్రభుత్వ సంక్షేమ హాస్టళ్లన్నీ పూర్తి వసతులతో సిద్ధంగా ఉండాలని సీఎం ఆదేశించారు.
వసతులు: ప్రతి హాస్టల్‌లో టాయిలెట్లు, ఆర్వో ప్లాంట్లు పని చేయాలి.
నిధులు: వసతుల మెరుగుదలకు సాస్కీ నిధులు కేటాయించామని, నిధులు ఇచ్చాక కూడా ఫిర్యాదులు వస్తే అధికారులదే బాధ్యతని హెచ్చరించారు.
పర్యవేక్షణ: ఆహారం, నీటి సరఫరాలో లోపాలు ఉండకూడదు. ఉన్నతాధికారులు నిరంతరం తనిఖీలు చేపట్టాలి.
మహిళల జోలికి వస్తే వణికిపోవాల్సిందే!
రాష్ట్రంలో శాంతిభద్రతల విషయంలో రాజీ పడే ప్రసక్తే లేదని ముఖ్యమంత్రి స్పష్టం చేశారు.
మహిళలు, చిన్నారుల భద్రతకు పదింతల ప్రాధాన్యత ఇస్తామని తెలిపారు.
నేరస్థుల్లో భయం పెంచేలా కఠిన చర్యలు తీసుకోవాలని పోలీసు శాఖను ఆదేశించారు.
గత ప్రభుత్వంలో పెచ్చుమీరిన గంజాయి, డ్రగ్స్ సంస్కృతిని పూర్తిగా అరికట్టాలన్నారు. గంజాయి నివారణకు ఏపీ అమలు చేస్తున్న ‘ఈగల్’ విధానాన్ని ఒడిషా ప్రభుత్వం కూడా అనుసరిస్తోందని ఈ సందర్భంగా గుర్తు చేశారు.
పట్టణాల్లో ‘స్వచ్ఛ’ విప్లవం – తాడిపత్రి రోల్ మోడల్
మున్సిపల్ అధికారుల తీరుపై ముఖ్యమంత్రి కీలక సూచనలు చేశారు:
తాగునీరు, వీధి దీపాలు, డ్రైనేజీ సమస్యలపై ప్రజల నుంచి ఫిర్యాదు రాకుండా చూడాలి.
నీటి శాంపిళ్లను తరచూ ల్యాబ్ టెస్టులకు పంపాలి. పైపులైన్లలో మురుగునీరు కలవకుండా జాగ్రత్తలు తీసుకోవాలి.
పారిశుద్ధ్య నిర్వహణలో తాడిపత్రి మున్సిపాలిటీని రోల్ మోడల్‌గా తీసుకోవాలని అధికారులకు సూచించారు.
గ్రామాల్లోనూ ‘అన్న క్యాంటీన్లు’.. ఏజెన్సీలో ‘డ్రోన్’ వైద్యం
పేదల ఆకలి తీర్చే అన్న క్యాంటీన్లను పట్టణాలతో పాటు ఇకపై రూరల్ నియోజకవర్గాల్లోనూ ఏర్పాటు చేయబోతున్నట్లు సీఎం ప్రకటించారు.
అల్లూరి, మన్యం, పోలవరం వంటి ఏజెన్సీ ప్రాంతాల్లో డ్రోన్ల ద్వారా వైద్య సేవలు అందించే పైలట్ ప్రాజెక్టును చేపట్టాలని ఆదేశించారు.
జలధార కార్యక్రమం ద్వారా చెరువులను నింపడం, కాలువల పూడికతీత పనులను వేగవంతం చేయాలన్నారు. జలధార నిర్వహణలో అన్నమయ్య జిల్లా మోడల్‌ను రాష్ట్రవ్యాప్తంగా అమలు చేయాలని సూచించారు.
ఈ సమీక్షా సమావేశంలో ప్రభుత్వ ప్రధాన కార్యదర్శి సాయి ప్రసాద్‌తో పాటు పలు శాఖల ఉన్నతాధికారులు పాల్గొన్నారు.