ఎమ్మెల్యే పవార్ రామారావు పటేల్ కృషి ఫలితమే: ప్రిన్సిపాల్, అధ్యాపకుల కృతజ్ఞతలు
స్థానిక విద్యార్థులకు ఉన్నత విద్య మరింత చేరువ కానున్న అధ్యయన కేంద్రం
ముధోల్, జూలై 25: (E6 tv NEWS:తిరుపతి గౌడ్)
ముధోల్ ప్రభుత్వ డిగ్రీ కళాశాలను డాక్టర్ బి.ఆర్. అంబేద్కర్ సార్వత్రిక విశ్వవిద్యాలయం (డా. బి.ఆర్. అంబేద్కర్ ఓపెన్ యూనివర్సిటీ) అధ్యయన కేంద్రంగా ఎంపిక చేయడం పట్ల విద్యార్థులు, విద్యావేత్తలు, ప్రజాప్రతినిధులు హర్షం వ్యక్తం చేశారు. ఈ కేంద్రం ఏర్పాటుతో ముధోల్తో పాటు పరిసర ప్రాంతాల విద్యార్థులకు స్థానికంగానే ఉన్నత విద్యను అభ్యసించే అవకాశం లభించనుంది.
ఎమ్మెల్యేకు ఘన సన్మానం
ఈ సందర్భంగా ప్రభుత్వ డిగ్రీ కళాశాల ప్రిన్సిపాల్ కర్రోల బుచ్చయ్య, అధ్యయన కేంద్రం కోఆర్డినేటర్ డా. పవన్ పాండే, అధ్యాపకులు డా. సీహెచ్. సంజీవ్ కుమార్ తదితరులు అధ్యయన కేంద్రం మంజూరుకు కృషి చేసిన ముధోల్ ఎమ్మెల్యే పవార్ రామారావు పటేల్ను ఘనంగా సన్మానించి ప్రత్యేక కృతజ్ఞతలు తెలిపారు.
ఉద్యోగులు, మహిళలకు ఉన్నత విద్యకు అవకాశం
అధ్యయన కేంద్రం ప్రారంభం కావడంతో ఉద్యోగులు, మహిళలు, గ్రామీణ ప్రాంతాల విద్యార్థులు తమ ఉద్యోగాలు, ఇతర బాధ్యతలు నిర్వహించుకుంటూనే దూరవిద్య విధానంలో ఉన్నత విద్యను అభ్యసించే అవకాశం కలుగుతుందని అధ్యాపకులు తెలిపారు. ఈ కేంద్రం ముధోల్ ప్రాంత విద్యాభివృద్ధికి కొత్త దిశగా నిలుస్తుందని ఆశాభావం వ్యక్తం చేశారు.
సహకరించిన వారికి ధన్యవాదాలు
అధ్యయన కేంద్రం ఏర్పాటుకు సహకరించిన ముధోల్ గ్రామ ప్రజలు, గ్రామ అభివృద్ధి కమిటీ సభ్యులు, ప్రజాప్రతినిధులు, విద్యాశాఖ అధికారులకు ప్రిన్సిపాల్, అధ్యాపక బృందం కృతజ్ఞతలు తెలియజేశారు. ఈ అధ్యయన కేంద్రం ద్వారా గ్రామీణ విద్యార్థులకు నాణ్యమైన ఉన్నత విద్య మరింత అందుబాటులోకి వస్తుందని పేర్కొన్నారు.
