- రాత్రివేళల్లో పదుల సంఖ్యలో ట్రాక్టర్ల ద్వారా బోధన్ వైపు తరలింపు అంటూ స్థానికుల ఆరోపణలు
- డోజర్లతో నది గర్భంలో తవ్వకాలు జరుగుతున్నాయన్న విమర్శలు
- జిల్లా యంత్రాంగం తక్షణ చర్యలు తీసుకోవాలని ప్రజల విజ్ఞప్తి
సాలూరా, జూలై 17: E6 న్యూస్, అశోక్ కాంబ్లే.
సాలూరా మండలంలోని మంధర్నా, తగ్గేలి గ్రామాల పరిసరాల్లో ప్రవహిస్తున్న మంజీరా నది నుంచి యథేచ్ఛగా ఇసుక అక్రమ రవాణా జరుగుతోందని స్థానికులు ఆరోపిస్తున్నారు. ప్రతి రోజు రాత్రి వేళల్లో పదుల సంఖ్యలో ఇసుకతో నిండిన ట్రాక్టర్లు బోధన్ వైపు తరలిపోతున్నాయని వారు పేర్కొంటున్నారు.
తగ్గేలి గ్రామ సమీపంలోని మంజీరా నది గర్భంలో డోజర్ల సహాయంతో రాత్రి సమయంలో పెద్దఎత్తున ఇసుక తవ్వకాలు నిర్వహిస్తున్నారని కూడా స్థానికులు ఆరోపిస్తున్నారు. ఈ అక్రమ తవ్వకాల కారణంగా నది సహజ స్వరూపం దెబ్బతినడంతో పాటు పర్యావరణానికి నష్టం వాటిల్లే అవకాశం ఉందని ఆందోళన వ్యక్తం చేస్తున్నారు.అక్రమ ఇసుక రవాణా జరిగే మార్గాల్లో పోలీసు సిబ్బంది ఉన్నప్పటికీ, ఇసుకతో నిండిన వాహనాలు ఎలాంటి ఆటంకం లేకుండా వెళ్తున్నాయని స్థానికులు ఆరోపిస్తున్నారు. సంబంధిత అధికారులు తగిన పర్యవేక్షణ చేపట్టడం లేదనే విమర్శలు కూడా వినిపిస్తున్నాయి.
ఈ అంశంపై జిల్లా కలెక్టర్, పోలీస్ కమిషనర్, గనుల శాఖ అధికారులు తక్షణమే స్పందించి, అక్రమ ఇసుక తవ్వకాలు, రవాణాపై సమగ్ర విచారణ జరిపి, అక్రమాలకు పాల్పడుతున్న వారిపై, అలాగే సహకరిస్తున్న వారిపై చట్టపరమైన కఠిన చర్యలు తీసుకోవాలని స్థానికులు కోరుతున్నారు. అదేవిధంగా మంజీరా నదిలో అక్రమ ఇసుక తవ్వకాలను పూర్తిగా అరికట్టేందుకు ప్రత్యేక నిఘా ఏర్పాటు చేయాలని విజ్ఞప్తి చేస్తున్నారు.
