తెలంగాణ అభివృద్ధిపై ప్రధాని మోదీకి మహేశ్ కుమార్ గౌడ్ బహిరంగ లేఖ

తెలంగాణ రాష్ట్ర అభివృద్ధికి కేంద్ర ప్రభుత్వం పూర్తి సహకారం అందించాలని కోరుతూ టీపీసీసీ అధ్యక్షుడు మహేశ్ కుమార్ గౌడ్ ప్రధానమంత్రి నరేంద్ర మోదీకి బహిరంగ లేఖ రాశారు. రాష్ట్ర ప్రయోజనాల దృష్ట్యా పలు కీలక ప్రాజెక్టులకు నిధులు, అనుమతులు మంజూరు చేయాలని ఆయన డిమాండ్ చేశారు.
లేఖలోని ప్రధాన అంశాలు ఇవే:
మెట్రో మరియు రవాణా ప్రాజెక్టులు:
హైదరాబాద్ మెట్రో ఫేజ్ 2 ప్రాజెక్టుకు కేంద్రం వెంటనే ఆమోదం తెలపాలి. 38,595 కోట్ల రూపాయల ఈ ప్రాజెక్టును జాయింట్ వెంచర్ పద్ధతిలో చేపట్టాలి.
రీజినల్ రింగ్ రోడ్ ఉత్తర భాగానికి ఆర్థిక ఆమోదం తెలపడంతో పాటు, దక్షిణ భాగం నిర్మాణానికి అనుమతులు ఇవ్వాలి.
రీజినల్ రింగ్ రైలు ప్రాజెక్టును 100 శాతం కేంద్ర నిధులతోనే పూర్తి చేయాలి.
హైదరాబాద్ నుండి అమరావతి మీదుగా బందర్ పోర్ట్ వరకు గ్రీన్ ఫీల్డ్ ఎక్స్‌ప్రెస్ హైవే నిర్మించాలి.
హైదరాబాద్ – బెంగళూరు హైస్పీడ్ కారిడార్ అభివృద్ధికి కేంద్రం చొరవ చూపాలి.
నగర అభివృద్ధి మరియు మౌలిక సదుపాయాలు:
మూసీ పునరుజ్జీవన ప్రాజెక్టుకు ప్రత్యేక ఆర్థిక సాయం అందించాలి. దీన్ని జాతీయ స్థాయి అర్బన్ రివర్ రీస్టోరేషన్ ప్రాజెక్టుగా గుర్తించాలి.
బాపూఘాట్ గాంధీ సరోవర్ ప్రాజెక్టుకు రక్షణ శాఖ అనుమతులు వెంటనే మంజూరు చేయాలి.
నగరంలో రేడియల్ రోడ్ల కోసం 45 వేల కోట్ల రూపాయలు, సిగ్నల్ ఫ్రీ ప్రాజెక్టు కింద ఫ్లైఓవర్లు, అండర్ పాస్ ల నిర్మాణానికి నిధులు కేటాయించాలి.
పారిశ్రామిక మరియు విద్యా రంగం:
సెమీకండక్టర్ మిషన్ కింద హైదరాబాద్ ఫ్యాబ్ సిటీకి ప్రాధాన్యత ఇచ్చి, పెండింగ్ లో ఉన్న ప్రాజెక్టులకు తుది ఆమోదం ఇవ్వాలి.
కాజీపేట కోచ్ ఫ్యాక్టరీని పూర్తి స్థాయి యూనిట్ గా మార్చాలి.
రాష్ట్రంలోని కొత్త జిల్లాలకు కేంద్రీయ విద్యాలయాలు, నవోదయ పాఠశాలలు మంజూరు చేయాలి.
రాజకీయ విమర్శలు:
తెలంగాణ విభజన హామీలను వెంటనే అమలు చేయాలని మహేశ్ కుమార్ గౌడ్ డిమాండ్ చేశారు. గతంలో తెలంగాణ ఏర్పాటుపై ప్రధాని చేసిన వ్యాఖ్యలను, అలాగే బీజేపీ నేత తేజస్వీ సూర్య తెలంగాణను పాకిస్థాన్ తో పోల్చడాన్ని ఆయన తీవ్రంగా తప్పుపట్టారు. తెలంగాణపై విషం చిమ్మడం ఆపి, రాష్ట్రానికి నిధులు ఇస్తేనే ప్రధానికి రాష్ట్రంపై ప్రేమ ఉందని భావిస్తామని ఆయన పేర్కొన్నారు. లేనిపక్షంలో తెలంగాణ ప్రజలు బీజేపీని ద్రోహులుగా చూస్తారని ఆయన హెచ్చరించారు.