కాకతీయ హిల్స్లో నివాసితుల భద్రతకు ముప్పు కలిగించే చర్యలపై విచారణ జరిపి కఠిన చర్యలు తీసుకోవాలి
రంగారెడ్డి జిల్లా శేర్లింగంపల్లి మండలంలోని కాకతీయ హిల్స్ కాలనీ పూర్తిగా నివాస ప్రాంతంగా అభివృద్ధి చెందినప్పటికీ, ఇటీవల కొంతమంది వాణిజ్య సంస్థలు, చిన్న హోటళ్లు, చికెన్ సెంటర్లు, కర్రీ పాయింట్లు తదితర వ్యాపార కార్యకలాపాలు నిర్వహించడం వల్ల కాలనీవాసులు ఇబ్బందులు ఎదుర్కొంటున్నారని కాకతీయ హిల్స్ వెల్ఫేర్ అసోసియేషన్ (KHWA) ప్రతినిధులు తెలిపారు.
నివాసితుల ఫిర్యాదుల ప్రకారం, కొన్ని హోటళ్లలో కట్టెల పొయ్యిల వినియోగం కారణంగా కాలుష్యం పెరగడంతో పాటు, రహదారులపై వాహనాల రద్దీ అధికమై ట్రాఫిక్ సమస్యలు తలెత్తుతున్నాయని పేర్కొన్నారు. ఈ అంశాలపై సంబంధిత అధికారులకు ఫిర్యాదు చేయగా, కొన్ని వ్యాపార సంస్థలకు నోటీసులు జారీ చేసినట్లు సమాచారం అందినట్లు తెలిపారు.
అయితే, నోటీసులు అందుకున్న ఒక వ్యాపార సంస్థ నిర్వాహకుడు అసోసియేషన్ అధ్యక్షుడు మరియు ఆయన కుటుంబ సభ్యులను లక్ష్యంగా చేసుకుని బెదిరింపులకు పాల్పడ్డారని, బయటి వ్యక్తులను కాలనీలోకి తీసుకువచ్చి ఉద్రిక్త పరిస్థితులు సృష్టించారని నివాసితులు ఆరోపించారు. ఈ సందర్భంగా ప్రాంతీయ విద్వేషాలను రెచ్చగొట్టే వ్యాఖ్యలు చేసినట్లు ఫిర్యాదులో పేర్కొన్నారని తెలిపారు.
అదేవిధంగా, అసోసియేషన్ ప్రత్యేక ఆహ్వానితుడు శ్రీ సుధీర్పై దాడి జరిగినట్లు, మరో ఉద్యోగిపై కూడా దౌర్జన్యానికి పాల్పడినట్లు సంబంధిత ఫిర్యాదుల్లో పేర్కొన్నారని వెల్లడించారు. ఈ ఘటనలతో కాలనీవాసుల్లో భయాందోళనలు నెలకొన్నాయని తెలిపారు.
ఈ వ్యవహారంపై మాదాపూర్ పోలీస్ స్టేషన్లో ఫిర్యాదు చేసినప్పటికీ, ఇప్పటివరకు తగిన చర్యలు తీసుకోవడంలో జాప్యం జరుగుతోందని నివాసితులు ఆందోళన వ్యక్తం చేస్తున్నట్లు పేర్కొన్నారు. కాలనీలో శాంతి భద్రతలకు విఘాతం కలిగించే చర్యలపై సమగ్ర విచారణ జరిపి, బాధ్యులపై చట్టపరమైన చర్యలు తీసుకోవాలని వారు డిమాండ్ చేశారు.
ఇదిలా ఉండగా, ఘటనపై స్పందించిన జాతీయ బీసీ దళ్ అధ్యక్షుడు దుండ్ర కుమారస్వామి, కాకతీయ హిల్స్ వెల్ఫేర్ అసోసియేషన్ ప్రతినిధులను కలిసి సంఘీభావం ప్రకటించారు. చట్టాన్ని తమ చేతుల్లోకి తీసుకునే వారిపై కఠిన చర్యలు తీసుకోవాలని, నివాసితుల భద్రతకు భరోసా కల్పించాలని ప్రభుత్వం మరియు పోలీసు శాఖను కోరారు.
కాకతీయ హిల్స్లో శాంతి భద్రతలు, సామాజిక సామరస్యం పరిరక్షణకు అవసరమైన అన్ని చర్యలు తీసుకోవాలని సంబంధిత అధికారులను ఆయన విజ్ఞప్తి చేశారు.
