ముధోల్, సెప్టెంబర్ 8: (E6tv NEWS: ప్రతినిధి).
ముధోల్లోని వ్యవసాయ పరిశోధనా కేంద్రాన్ని భైంసాకు చెందిన శ్రీ సరస్వతి శిశు మందిర్ విద్యార్థులు క్షేత్ర సందర్శనలో భాగంగా సందర్శించారు. ఈ సందర్భంగా విద్యార్థులకు వ్యవసాయ శాస్త్రవేత్తలు డా. ఆకుల దినేష్ మరియు డా. కిషోర్ ఆధ్వర్యంలో మట్టి నమూనాల సేకరణ (Soil Sampling), నేల పరీక్షల ప్రాముఖ్యత, నేల ఆరోగ్యం మరియు పంటల పెరుగుదలలో నేల పోషకాల పాత్ర గురించి అవగాహన కల్పించారు.అలాగే ఎల్ నినో (El Niño) ప్రభావం వల్ల వాతావరణ పరిస్థితుల్లో వచ్చే మార్పులు, వర్షపాతం, ఉష్ణోగ్రతలు మరియు వ్యవసాయంపై పడే ప్రభావం గురించి విద్యార్థులకు వివరించారు. వాతావరణ మార్పులను ముందుగానే అర్థం చేసుకొని రైతులు తగిన వ్యవసాయ పద్ధతులను అవలంబించాల్సిన అవసరాన్ని శాస్త్రవేత్తలు వివరించారు.
ఈ క్షేత్ర సందర్శనలో విద్యార్థులు ఉత్సాహంగా పాల్గొని మట్టి నమూనాల సేకరణ విధానం, వ్యవసాయ పరిశోధనలు మరియు వాతావరణ ప్రభావాలపై అనేక విషయాలను తెలుసుకున్నారు. పాఠశాల ఉపాధ్యాయులు కూడా ఈ కార్యక్రమంలో పాల్గొని విద్యార్థులకు అవసరమైన సహకారం అందించారు.విద్యార్థులకు వ్యవసాయంపై శాస్త్రీయ అవగాహన పెంపొందించేందుకు ఇటువంటి క్షేత్ర సందర్శనలు ఎంతో ఉపయోగకరంగా ఉంటాయని కార్యక్రమంలో పాల్గొన్న వారు తెలిపారు.
