మొండి కత్వల వాగు: ఏళ్లు తరబడి తమను వేధిస్తున్న తాగునీటి సమస్యను పరిష్కరించడంలో అధికారులు విఫలమయ్యారని స్థానిక గిరిజనులు తీవ్ర ఆందోళన వ్యక్తం చేశారు. మొండి కత్వల వాగు పరిసర ప్రాంతాల్లోని పందిరిగుట్ట తండాతో పాటు మరో మూడు తండాల ప్రజలు తాగునీరు దొరకక తీవ్ర అవస్థలు పడుతున్నారు.
నీటి కోసం రోజూ కిలోమీటర్ల దూరం నడచి వెళ్లాల్సి వస్తోందని, దీనివల్ల ముఖ్యంగా మహిళలు, చిన్నారులు తీవ్ర ఇబ్బందులు ఎదుర్కొంటున్నారని బాధితులు ఆవేదన వ్యక్తం చేశారు. ప్రభుత్వాలు మారుతున్నా తమ బతుకుల్లో ఎలాంటి మార్పు రావడం లేదని ఆగ్రహం వ్యక్తం చేశారు. ఇప్పటికైనా అధికారులు తక్షణమే స్పందించి తండాలకు శాశ్వత తాగునీటి సౌకర్యం కల్పించాలని డిమాండ్ చేశారు. సమస్య పరిష్కారమయ్యే వరకు తమ నిరసనలు ఆపేది లేదని గిరిజనులు హెచ్చరించారు.
