భీంగల్: నిజామాబాద్ జిల్లా భీంగల్ మండలంలో అభివృద్ధి పనుల చుట్టూ తిరుగుతున్న రాజకీయాలు ఇప్పుడు మరింత వేడెక్కాయి. వంద పడకల ప్రభుత్వ ఆసుపత్రి, బస్ డిపో, వెజ్ అండ్ నాన్ వెజ్ మార్కెట్ నిర్మాణాలపై కాంగ్రెస్, బీఆర్ఎస్ పార్టీల మధ్య మాటల యుద్ధం ముదిరింది. కాంగ్రెస్ నాయకులు చేస్తున్న ఆరోపణలను భీంగల్ బీఆర్ఎస్ శ్రేణులు తీవ్రంగా ఖండించాయి. గత ప్రభుత్వం చేసిన పనులను తమ ఖాతాలో వేసుకోవడమే కాకుండా, చేతగానితనాన్ని కప్పిపుచ్చుకోవడానికి అబద్ధపు ప్రచారాలు చేస్తున్నారని బీఆర్ఎస్ నేతలు ధ్వజమెత్తారు.
ఆసుపత్రి నిర్మాణం: 70 శాతం పనులు మేం చేస్తే.. కాంగ్రెస్ ఏం చేసింది?
కాంగ్రెస్ నాయకుడు సునీల్ రెడ్డి భీంగల్ ఆసుపత్రిపై చేస్తున్న వ్యాఖ్యలు పూర్తిగా అవాస్తవాలని బీఆర్ఎస్ నాయకులు కొట్టిపారేశారు. ఈ సందర్భంగా వారు కొన్ని కీలక గణాంకాలను తెరపైకి తెచ్చారు:
శంకుస్థాపన: 2022లోనే బీఆర్ఎస్ ప్రభుత్వ హయాంలో ఈ వంద పడకల ఆసుపత్రికి శంకుస్థాపన జరిగింది.
పనుల వేగం: కేవలం 15 నెలల వ్యవధిలోనే దాదాపు 70% పనులను పూర్తి చేశాం.
బడ్జెట్ వివరాలు: రూ.22 కోట్ల అంచనా వ్యయంతో చేపట్టిన ఈ ప్రాజెక్టులో.. రూ.15 కోట్ల విలువైన పనులు పూర్తి చేసి, కాంట్రాక్టర్కు రూ.13 కోట్ల బిల్లులు కూడా చెల్లించడం జరిగింది.
“గత 30 నెలలుగా అధికారంలో ఉన్న కాంగ్రెస్ ప్రభుత్వం.. మిగిలిన 30 శాతం పనులను కూడా పూర్తి చేయలేకపోయింది. కోట్ల రూపాయల పనులు పెండింగ్లో పెట్టి, మాపై విమర్శలు చేయడం సిగ్గుచేటు.”
– బీఆర్ఎస్ స్థానిక నాయకులు
బస్ డిపో, వెజ్ అండ్ నాన్ వెజ్ మార్కెట్ గురవస్థ ఇదేనా?
బీఆర్ఎస్ నేతలు కాంగ్రెస్ వైఫల్యాలను ఎండగడుతూ మరికొన్ని అంశాలను ప్రస్తావించారు:
భీంగల్ బస్ డిపో: మాజీ ఎమ్మెల్యే వేముల ప్రశాంత్ రెడ్డి, మాజీ మంత్రి బాజిరెడ్డి గోవర్ధన్ ప్రత్యేక కృషితో ఈ డిపోను ప్రారంభించారని గుర్తు చేశారు. అయితే కాంగ్రెస్ అధికారంలోకి రాగానే బస్ డిపో సేవలను నిలిపివేశారని, ఇప్పటివరకు వాటిని పునరుద్ధరించలేదని మండిపడ్డారు.
వెజ్ అండ్ నాన్ వెజ్ మార్కెట్: ఈ మార్కెట్ నిర్మాణంలోనూ బీఆర్ఎస్ హయాంలోనే 70 శాతం పనులు పూర్తయ్యాయని తెలిపారు. కాంగ్రెస్ వచ్చాక పనులు మూలనపడటంతో, ప్రస్తుతం మార్కెట్ ప్రాంగణమంతా తుమ్మ చెట్లతో అడవిలా మారిందని విమర్శించారు.
ఇసుక దందా, కమిషన్ రాజ్యంపై ఆత్మపరిశీలన చేసుకోండి!
రాజకీయ లబ్ధి కోసం అసత్యాలు ప్రచారం చేయడం మానుకుని, పెండింగ్ పనులను తక్షణమే పూర్తి చేయాలని బీఆర్ఎస్ డిమాండ్ చేసింది. ప్రస్తుతం నియోజకవర్గంలో ఇసుక అక్రమ రవాణా, అవినీతి, కమిషన్ల రాజ్యం నడుస్తోందని ప్రజలే బహిరంగంగా చర్చించుకుంటున్నారని ఆరోపించారు. ఇతరులపై వేలెత్తి చూపించే ముందు కాంగ్రెస్ నాయకులు తమ పాలనపై ఆత్మపరిశీలన చేసుకోవాలని హితవు పలికారు.
ఈ6టీవీ వ్యూ: భీంగల్లో అభివృద్ధి పనులపై ఇరు పార్టీల మధ్య నడుస్తున్న ఈ ‘సవాల్-ప్రతిసవాల్’ రాజకీయంగా కాక రేపుతోంది. మరి పాలకుల మాటల యుద్ధం పక్కన పెడితే.. స్థానికులకు ఎంతో ఉపయోగపడే ఈ పెండింగ్ ప్రాజెక్టులు ఎప్పటికి పూర్తవుతాయో వేచి చూడాలి.
