కృష్ణా జిల్లా :
కృష్ణా జిల్లా గుడివాడలో అర్ధరాత్రి జరిగిన ఓ పుట్టినరోజు వేడుకపై గుడివాడ వన్ టౌన్ పోలీసులు, ఎక్సైజ్ అధికారులు సంయుక్తంగా దాడులు నిర్వహించారు. మాజీ మంత్రి కొడాలి నాని అనుచరుడు, వైఎస్సార్సీపీ యువజన విభాగం నేత మెరుగుమాల కాళీ పుట్టినరోజు సందర్భంగా ఈ పార్టీని ఏర్పాటు చేసినట్లు అధికారులు తెలిపారు.
అర్ధరాత్రి హంగామా.. స్థానికుల ఫిర్యాదు
గుడివాడ టీచర్స్ కాలనీలోని ఓ భవనం పైఅంతస్తులో బుధవారం రాత్రి ఈ బర్త్డే వేడుకలు జరిగాయి.
- ఈ పార్టీకి దాదాపు 100 మందికి పైగా హాజరయ్యారు.
- పాల్గొన్న వారు కొడాలి నాని ఫోటో పట్టుకుని ఆయనకు అనుకూలంగా పెద్ద ఎత్తున నినాదాలు చేశారు.
- ఇందులో పలువురు వైఎస్సార్సీపీ కార్యకర్తలతో పాటు రౌడీ షీటర్లు కూడా ఉన్నట్లు పోలీసులు గుర్తించారు.
అర్ధరాత్రి సమయంలో పెద్ద ఎత్తున హంగామా చేస్తూ శబ్దకాలుష్యానికి గురిచేస్తుండటంతో తీవ్రంగా ఇబ్బందిపడిన స్థానికులు పోలీసులకు ఫిర్యాదు చేశారు.
భారీగా విదేశీ మద్యం స్వాధీనం – కేసు నమోదు
స్థానికుల ఫిర్యాదుతో తక్షణమే రంగంలోకి దిగిన పోలీసులు, ఎక్సైజ్ సిబ్బంది పార్టీ వేదికపై దాడి చేశారు. ఎలాంటి ఎక్సైజ్ అనుమతులు లేకుండానే అక్కడ భారీ స్థాయిలో మద్యాన్ని సేవించడమే కాకుండా, పెద్ద మొత్తంలో విదేశీ మద్యం సీసాలను నిల్వ ఉంచినట్లు అధికారులు కనుగొన్నారు. ఆ మద్యాన్ని ఎక్సైజ్ అధికారులు స్వాధీనం చేసుకున్నారు.
ఎక్సైజ్ నిబంధనలను ఉల్లంఘించినందుకు గాను కేసు నమోదు చేసి దర్యాప్తు చేపట్టినట్లు పోలీసులు వెల్లడించారు.
టీడీపీ ఆఫీస్ దాడి కేసులోనూ ముద్దాయి
ఈ ఘటనకు ప్రధానకారకుడైన మెరుగుమాల కాళీపై ఇప్పటికే పోలీసు రికార్డుల్లో రౌడీ షీట్ నమోదై ఉంది. గతంలో (2022లో) గుడివాడలోని తెలుగుదేశం పార్టీ (TDP) కార్యాలయంపై తన అనుచరులతో కలిసి దాడి చేసిన కేసులో కూడా ఈయన అరెస్ట్ అయ్యారని పోలీసులు తెలిపారు.
