హైదరాబాద్ :
పేదలకు అందజేసే గృహాలు కేవలం నివాసానికి మాత్రమే కాకుండా వారి జీవనోపాధికి భరోసా ఇచ్చేలా ఉండాలని తెలంగాణ ముఖ్యమంత్రి ఎ. రేవంత్ రెడ్డి స్పష్టం చేశారు. కోర్ అర్బన్ రీజియన్ (CURE) పరిధిలోని నివాస ప్రాంతాల్లోనే ‘ఇందిరమ్మ అర్బన్ హౌసింగ్’ కాలనీలను అభివృద్ధి చేయాలని అధికారులను ఆదేశించారు.
ఔటర్ రింగ్ రోడ్డు (ORR) పరిధిలో వివిధ ప్రభుత్వ శాఖలకు చెందిన ఖాళీ స్థలాలను గుర్తించి, వాటిని పేదల గృహనిర్మాణానికి సమర్థవంతంగా వినియోగించుకోవాలని సీఎం ఆదేశాలు జారీ చేశారు.
నగరానికి దూరంగా వద్దు.. పని ప్రదేశాల వద్దే ఇళ్లు!
ఇందిరమ్మ అర్బన్ హౌసింగ్ పథకం అమలుపై నిర్వహించిన ఉన్నత స్థాయి సమీక్షా సమావేశంలో సీఎం రేవంత్ రెడ్డి మాట్లాడుతూ.. నగరానికి సుదూర ప్రాంతాల్లో ఇళ్లు నిర్మించి ఇవ్వడం వల్ల లబ్ధిదారులు ఉపాధి అవకాశాలు లేక వాటిలో నివసించేందుకు ఆసక్తి చూపడం లేదని గుర్తుచేశారు. భవిష్యత్తులో నిర్మించే ప్రతీ ఇల్లు ప్రజల పని ప్రదేశాలకు చేరువలోనే ఉండి, వారి జీవనోపాధి దెబ్బతినకుండా చూడాలని ఆదేశించారు.
ఈ ప్రాజెక్ట్ కోసం పోలీస్, రెవెన్యూ, రవాణా శాఖలకు చెందిన ఖాళీ స్థలాలను వినియోగించుకోవాలని నిర్ణయించారు. ఇందుకు ప్రతిఫలంగా ఆయా శాఖలకు వేరే చోట ప్రత్యామ్నాయ స్థలాలను కేటాయించనున్నారు.
ఇంటి నిర్మాణం & బడ్జెట్ అంచనాలు:
- మొత్తం నిర్మాణ విస్తీర్ణం: ~528 చదరపు అడుగులు (కార్పెట్ ఏరియా: 400 చ.అ.)
- ఒక్కో ఇంటి యూనిట్ వ్యయం: రూ. 11 లక్షలు
- ప్రభుత్వ సబ్సిడీ: రూ. 5 లక్షలు (స్థలం ఖర్చు పూర్తిగా ఉచితం)
- లబ్ధిదారుడి వాటా: రూ. 6 లక్షలు
తొలి విడతలో 17 నియోజకవర్గాలు – 7,680 ఫ్లాట్లు:
మొదటి విడత కింద హైదరాబాద్ పరిసర ప్రాంతాలలోని 17 నియోజకవర్గాల్లో మొత్తం 7,680 ఫ్లాట్లను నిర్మించడానికి ప్రభుత్వం సమగ్ర ప్రణాళిక రూపొందించింది.
ఎంపిక చేసిన నియోజకవర్గాలు: రాజేంద్రనగర్, మహేశ్వరం, శేరిలింగంపల్లి, ఇబ్రహీంపట్నం, మల్కాజిగిరి, నాంపల్లి, ఖైరతాబాద్, జూబ్లీహిల్స్, కార్వాన్, బహదూర్పురా, అంబర్పేట్, కూకట్పల్లి, మేడ్చల్, కుత్బుల్లాపూర్, సనత్నగర్, సికింద్రాబాద్ కంటోన్మెంట్ మరియు మలక్పేట్.
ఈ నియోజకవర్గాల్లో భూసేకరణ ప్రక్రియను వేగవంతం చేసి ప్రాజెక్ట్ను యుద్ధప్రాతిపదికన ముందుకు తీసుకెళ్లాలని అధికారులను ఆదేశించారు. ఈ సమీక్షలో మంత్రులు పొంగులేటి శ్రీనివాసరెడ్డి, పొన్నం ప్రభాకర్తో పాటు పలువురు ఉన్నతాధికారులు పాల్గొన్నారు.
