హైదరాబాద్: ‘ప్రపంచ తల్లిపాల వారోత్సవాల’ (ఆగస్టు 1–7) సందర్భంగా రాష్ట్ర మహిళా, శిశు సంక్షేమ శాఖ మంత్రి డాక్టర్ ధనసరి అనసూయ (సీతక్క) అధికారులకు కీలక ఆదేశాలు జారీ చేశారు. తల్లిపాల ప్రాముఖ్యతను ప్రతి తల్లికి, ప్రతి కుటుంబానికి తెలియజేసేలా రాష్ట్రవ్యాప్తంగా విస్తృత అవగాహన కార్యక్రమాలు నిర్వహించాలని సూచించారు.
బిడ్డకు తల్లిపాలే మొదటి హక్కు:
తల్లి పాలు ప్రతి బిడ్డకు ప్రకృతి ప్రసాదించిన పరిపూర్ణ ఆహారమని, అది బిడ్డ మొదటి హక్కు అని మంత్రి సీతక్క పేర్కొన్నారు. కాన్పు అయిన వెంటనే వచ్చే ముర్రుపాలు (Colostrum) నవజాత శిశువుకు మొదటి రోగనిరోధక శక్తి (Immunity) గా పనిచేస్తాయని వివరించారు.
- బిడ్డ పుట్టిన మొదటి గంటలోనే పాలు పట్టడం తప్పనిసరి.
- మొదటి ఆరు నెలల పాటు కేవలం తల్లి పాలు మాత్రమే ఇవ్వాలి.
- ఆ తర్వాత రెండేళ్ల వరకు సరైన పౌష్టికాహారంతో పాటు తల్లి పాలు కొనసాగించడం వల్ల పిల్లల ఆరోగ్యకరమైన ఎదుగుదలకు బలమైన పునాది పడుతుందని స్పష్టం చేశారు.
అధికారిక వేడుక మాత్రమే కాదు.. ఒక ఉద్యమంలా చేయాలి!
ప్రపంచ తల్లిపాల వారోత్సవాలను కేవలం అధికారిక కార్యక్రమంగా కాకుండా, ప్రజా చైతన్య ఉద్యమంలా నిర్వహించాలని మంత్రి సూచించారు. రాష్ట్రంలోని అన్ని అంగన్వాడీ కేంద్రాలు, గ్రామాలు, వార్డుల్లో అవగాహన సదస్సులు, గృహ సందర్శనలు (Door-to-door visits), సమాజ ఆధారిత కార్యక్రమాలు చేపట్టాలని ఆదేశించారు.
అంగన్వాడీ టీచర్లు, ఆయాలు, సూపర్వైజర్లు, ఆశా వర్కర్లు మరియు ఆరోగ్య శాఖ సిబ్బంది సమన్వయంతో పనిచేయాలని కోరారు. ప్రభుత్వ, ప్రైవేటు ఆసుపత్రులను సందర్శించి గర్భిణులు, బాలింతలు, రెండేళ్ల లోపు పిల్లల తల్లులకు ప్రత్యేక కౌన్సెలింగ్ ఇవ్వాలని సూచించారు. తల్లిపాలపై ఉన్న అపోహలను తొలగించి, వైజ్ఞానిక అవగాహన కల్పించాలని.. ఈ ప్రక్రియలో కుటుంబ సభ్యులను భాగస్వాములను చేయాలని పిలుపునిచ్చారు.
మల్కాజ్గిరి నుండి మంచిర్యాల వరకు ‘అపోహలు లేని, పోషకాహార లోపం లేని తెలంగాణ’ నిర్మించడమే ప్రభుత్వ ధ్యేయమని, అందుకు తల్లి పాలే ప్రాథమిక పునాది అని స్పష్టం చేశారు. ఈ కార్యక్రమంలో ప్రజాప్రతినిధులు, వైద్యులు, స్వచ్ఛంద సంస్థలు భాగస్వాములు కావాలని సీతక్క విజ్ఞప్తి చేశారు.
