నల్గొండ / సూర్యాపేట:
తుంగతుర్తి కాంగ్రెస్ నియోజకవర్గంలో విభేదాలు ఒక్కసారిగా రోడ్డుకెక్కాయి. తిరుమలగిరి మండల కేంద్రంలో ఆదివారం తుంగతుర్తి ఎమ్మెల్యే మందుల శామ్యూల్, రాష్ట్ర రోడ్లు-భవనాల శాఖ మంత్రి కోమటిరెడ్డి వెంకటరెడ్డి అనుచరుల మధ్య తీవ్ర వాగ్వాదం, తోపులాట జరిగి ఉద్రిక్తతకు దారితీసింది. పరిస్థితి చేయిదాటడంతో పోలీసులు ప్రవేశించి ఇరువర్గాలను చెదరగొట్టారు.
ఘర్షణకు అసలు కారణం:
- ప్రోటోకాల్ వివాదం: తన నియోజకవర్గంలో 2 కిలోమీటర్ల రోడ్డు అభివృద్ధి పనుల నిమిత్తం మంత్రి కోమటిరెడ్డి వెంకటరెడ్డి శుక్రవారం పర్యటించారని, అయితే ఎమ్మెల్యేగా ఉన్న తనకు ఎలాంటి సమాచారం ఇవ్వకుండా ప్రోటోకాల్ను ఉల్లంఘించారని ఎమ్మెల్యే మందుల శామ్యూల్ మీడియా ముందు అసంతృప్తి వ్యక్తం చేశారు.
- ప్రెస్ మీట్ & క్షమాపణల డిమాండ్: ఎమ్మెల్యే శామ్యూల్ చేసిన వ్యాఖ్యలపై ఆగ్రహం వ్యక్తం చేసిన మంత్రి కోమటిరెడ్డి అనుచరులు, ఎమ్మెల్యే క్షమాపణ చెప్పాలని డిమాండ్ చేస్తూ తిరుమలగిరిలో ప్రెస్ మీట్ ఏర్పాటు చేశారు.
- రచ్చకెక్కిన సవాల్: ఈ సమాచారం అందుకున్న ఎమ్మెల్యే శామ్యూల్ అనుచరులు అక్కడికి చేరుకుని మంత్రి వర్గీయులను నిలదీశారు. దీంతో ఇరువర్గాల మధ్య మాటామాటా పెరిగి ఘర్షణకు దారితీసింది.
పోలీసులకు ఫిర్యాదు:
ఈ ఘటనపై మంత్రి కోమటిరెడ్డి వెంకటరెడ్డి మద్దతుదారులు ఎమ్మెల్యే శామ్యూల్ అనుచరులపై సూర్యాపేట పోలీసులకు ఫిర్యాదు చేయడానికి సిద్ధమైనట్లు సమాచారం.
కాగా, కేవలం మూడు వారాల క్రితమే (జులై 8న) భువనగిరి ఎంపీ చామల కిరణ్ కుమార్ రెడ్డి అనుచరులపై కూడా ఎమ్మెల్యే శామ్యూల్ మద్దతుదారులు అర్వపల్లి వద్ద దాడి చేసిన ఘటన మరువకముందే.. ఇప్పుడు మంత్రి అనుచరులతో మళ్లీ ఘర్షణ పడటంతో ఉమ్మడి నల్గొండ జిల్లా కాంగ్రెస్లో అంతర్గత పోరు తీవ్రస్థాయికి చేరింది.
