హైకోర్టు తీర్పును సాకుగా చూపి పేదింటి ఆడబిడ్డలకు అన్యాయం చేయొద్దు
కాంగ్రెస్ ప్రభుత్వం తీరుపై బీఆర్ఎస్ నేతల ఆగ్రహం
పెండింగ్లో ఉన్న అర్హుల దరఖాస్తులను వెంటనే పరిష్కరించాలని డిమాండ్
నిజామాబాద్, ఆగస్టు 17: (E6tv NEWS: శివ ఠాకూర్)
కళ్యాణలక్ష్మి, షాదీ ముబారక్ పథకాలను వెంటనే పునరుద్ధరించి, అర్హులైన లబ్ధిదారులకు పెండింగ్లో ఉన్న ఆర్థిక సహాయాన్ని విడుదల చేయాలని డిమాండ్ చేస్తూ నిజామాబాద్ ధర్నా చౌక్లో బీఆర్ఎస్ పార్టీ ఆధ్వర్యంలో భారీ నిరసన కార్యక్రమం నిర్వహించారు. బీఆర్ఎస్ పార్టీ వర్కింగ్ ప్రెసిడెంట్ కేటీఆర్ పిలుపు మేరకు, నిజామాబాద్ అర్బన్ మాజీ ఎమ్మెల్యే గణేష్ బిగాల ఆదేశాల మేరకు నగర అధ్యక్షుడు సిర్ప రాజు ఆధ్వర్యంలో ఈ కార్యక్రమం జరిగింది. ఈ సందర్భంగా కాంగ్రెస్ ప్రభుత్వానికి వ్యతిరేకంగా “సీఎం డౌన్ డౌన్” అంటూ నినాదాలు చేశారు.
పేదింటి ఆడబిడ్డలకు అండగా నిలిచిన పథకాలు
ఈ సందర్భంగా బీఆర్ఎస్ నాయకులు మాట్లాడుతూ.. పేద కుటుంబాల్లో ఆడబిడ్డల వివాహానికి ఆర్థిక భరోసా కల్పించాలనే ఉద్దేశంతో కేసీఆర్ ప్రభుత్వం కళ్యాణలక్ష్మి, షాదీ ముబారక్ పథకాలను ప్రారంభించిందని గుర్తుచేశారు. 2014 అక్టోబర్ 2న ప్రారంభమైన ఈ పథకాల ద్వారా తొలుత రూ.51 వేల ఆర్థిక సహాయం అందించగా, దశలవారీగా రూ.75,116కు, అనంతరం రూ.1,00,116కు పెంచినట్లు తెలిపారు.
13 లక్షల కుటుంబాలకు రూ.13 వేల కోట్ల సాయం
కేసీఆర్ ప్రభుత్వ హయాంలో సుమారు 13 లక్షల మంది ఆడబిడ్డల కుటుంబాలకు రూ.13 వేల కోట్ల మేర ఆర్థిక సహాయం అందించినట్లు బీఆర్ఎస్ నేతలు పేర్కొన్నారు. కరోనా వంటి విపత్కర పరిస్థితుల్లోనూ పథకాన్ని కొనసాగించి పేద కుటుంబాలకు అండగా నిలిచామని తెలిపారు.
తులం బంగారం హామీ ఏమైంది?
ఎన్నికల సమయంలో కళ్యాణలక్ష్మితో పాటు ఆడబిడ్డలకు తులం బంగారం ఇస్తామని కాంగ్రెస్ పార్టీ హామీ ఇచ్చిందని బీఆర్ఎస్ నాయకులు గుర్తుచేశారు. అధికారంలోకి వచ్చిన తర్వాత పథకాన్ని మరింత బలోపేతం చేయాల్సింది పోయి, పథకానికే ముప్పు తెచ్చే విధంగా ప్రభుత్వం వ్యవహరిస్తోందని ఆరోపించారు. తులం బంగారం హామీపై ఆడబిడ్డలు, వారి కుటుంబాలు ప్రశ్నిస్తున్న నేపథ్యంలో ప్రభుత్వం సమాధానం చెప్పాలని డిమాండ్ చేశారు.
పెండింగ్ సాయం కోసం లబ్ధిదారుల ఎదురుచూపులు
కాంగ్రెస్ ప్రభుత్వం అధికారంలోకి వచ్చిన తర్వాత కళ్యాణలక్ష్మి పథకం అమలు పరిస్థితి దారుణంగా మారిందని బీఆర్ఎస్ నేతలు విమర్శించారు. పెళ్లిళ్లు పూర్తయి చాలా కాలం గడిచినా అర్హులైన అనేక మంది లబ్ధిదారులకు ఆర్థిక సహాయం అందక ప్రభుత్వ కార్యాలయాల చుట్టూ తిరుగుతున్నారని అన్నారు. కొన్ని సందర్భాల్లో పెళ్లి అనంతరం కుటుంబ పరిస్థితులు మారిపోయేంత కాలం గడిచినా సాయం అందని పరిస్థితులు ఉన్నాయని ఆవేదన వ్యక్తం చేశారు.
కోర్టులో ప్రభుత్వం తీరుపై ప్రశ్నలు
కళ్యాణలక్ష్మి అంశంపై హైకోర్టులో ప్రభుత్వం వ్యవహరించిన తీరుపై కూడా బీఆర్ఎస్ నేతలు తీవ్రంగా మండిపడ్డారు. నాలుగుసార్లు గడువు లభించినప్పటికీ ప్రభుత్వం ఎందుకు కౌంటర్ దాఖలు చేయలేదని ప్రశ్నించారు. పేదింటి ఆడబిడ్డల ప్రయోజనాలకు సంబంధించిన కీలకమైన అంశంలో ప్రభుత్వం తన వాదనను బలంగా వినిపించాల్సిన బాధ్యత ఉందని అన్నారు.
పేదల పథకాన్ని కాపాడేందుకు న్యాయపోరాటం చేయాలి
ముఖ్యమంత్రి, మంత్రులకు సంబంధించిన వివిధ కేసులు, ఇతర అంశాల్లో ప్రైవేటు న్యాయవాదులను నియమించుకునే ప్రభుత్వం.. పేదింటి ఆడబిడ్డల ప్రయోజనాలతో ముడిపడిన కళ్యాణలక్ష్మి పథకాన్ని కాపాడేందుకు సమర్థవంతమైన న్యాయపోరాటం ఎందుకు చేయలేదని బీఆర్ఎస్ నేతలు ప్రశ్నించారు. హైకోర్టు పరిణామాలను సాకుగా చూపకుండా పథకాలను కొనసాగించేందుకు ప్రభుత్వం తక్షణ చర్యలు చేపట్టాలని డిమాండ్ చేశారు.
పథకాలు కొనసాగించాల్సిందే
కళ్యాణలక్ష్మి, షాదీ ముబారక్ పథకాలు కేవలం ప్రభుత్వ సంక్షేమ పథకాలు మాత్రమే కాదని, తెలంగాణలోని పేదింటి ఆడబిడ్డల ఆత్మగౌరవం, కుటుంబాల ఆర్థిక భరోసాతో ముడిపడి ఉన్న కార్యక్రమాలని బీఆర్ఎస్ నేతలు పేర్కొన్నారు. రాజకీయ కక్ష సాధింపులను పక్కనపెట్టి పథకాలను పూర్తిస్థాయిలో కొనసాగించాలని కోరారు.
పెండింగ్ దరఖాస్తులు వెంటనే పరిష్కరించాలి
అర్హులైన లబ్ధిదారుల పెండింగ్ దరఖాస్తులను వెంటనే పరిష్కరించి ఆర్థిక సహాయాన్ని విడుదల చేయాలని, తెలంగాణ ఆడబిడ్డలకు ఇచ్చిన తులం బంగారం హామీని అమలు చేయాలని బీఆర్ఎస్ నేతలు డిమాండ్ చేశారు. కళ్యాణలక్ష్మి, షాదీ ముబారక్ పథకాలను ఎట్టి పరిస్థితుల్లోనూ రద్దు చేయకూడదని స్పష్టం చేశారు.
ఈ కార్యక్రమంలో మాజీ మేయర్ దండు నీతు కిరణ్ శేఖర్, మాజీ NUDA చైర్మన్ ప్రభాకర్ రెడ్డి, సత్య ప్రకాష్, నవీద్ ఇక్బాల్, అబ్దుల్ మతీన్, జగత్ రెడ్డి తదితర బీఆర్ఎస్ నాయకులు, కార్యకర్తలు, మహిళా నాయకులు, యువ నాయకులు, వివిధ విభాగాల ప్రతినిధులు పాల్గొన్నారు.
