హైదరాబాద్ (E6TV న్యూస్): మెదక్ జిల్లా కౌడిపల్లి మండలం మహమ్మద్నగర్ పిఎసిఎస్ (PACS) వడ్ల కొనుగోలు కేంద్రంలో భారీ కుంభకోణం జరిగిందని బిఆర్ఎస్ సీనియర్ నేత, మాజీ మంత్రి తన్నీరు హరీష్ రావు తీవ్రస్థాయిలో ఆరోపించారు. కొనుగోలు కేంద్రానికి కనీసం ధాన్యం రాకుండానే కొనుగోలు చేసినట్లు కాగితాల్లో చూపించి, సుమారు కోటి రూపాయల ప్రజాధనాన్ని దోచుకున్నారని మండిపడ్డారు.
ఆరోపణల ముఖ్యాంశాలు
- రూ. కోటి విలువైన కుంభకోణం: మహమ్మద్నగర్ ప్రాథమిక వ్యవసాయ సహకార పరపతి సంఘం (పీఏసీఎస్) కేంద్రంలో ఒక్క క్వింటాల్ వడ్లు కూడా సేకరించకుండానే కొనుగోలు జరిపినట్లు నకిలీ రికార్డులు సృష్టించి కోటి రూపాయల నిధులను గోల్మాల్ చేశారని ఆరోపించారు.
- యువకుడి ఆత్మహత్య – అసలు నిందితులపై రక్షణ: ఈ కుంభకోణంలో కేవలం కంప్యూటర్ ఆపరేటర్గా పనిచేస్తున్న అర్షద్ అనే యువకుడిని అరెస్ట్ చేశారని, తీవ్ర మనస్తాపానికి గురైన ఆ యువకుడు ఆత్మహత్యకు పాల్పడటం అత్యంత విచారకరమని ఆవేదన వ్యక్తం చేశారు. అసలు సూత్రధారులను, పెద్దలను కాపాడేందుకే ఆపరేటర్ను బలపశువును చేశారని విమర్శించారు.
- ఉన్నత స్థాయి విచారణకు డిమాండ్: ఈ దారుణ ఘటనపై వ్యవసాయ శాఖ మంత్రి తుమ్మల నాగేశ్వరరావు, జిల్లా ఎస్పీ తక్షణమే స్పందించి ఉన్నత స్థాయి సమగ్ర విచారణ జరిపించాలని డిమాండ్ చేశారు. బాధ్యులైన అసలు నిందితులను అరెస్ట్ చేసి కఠినంగా శిక్షించాలని కోరారు.
