హైదరాబాద్: రష్యాలో వ్యవసాయ భూములను కొనుగోలు చేసి అధిక లాభాలు అందిస్తామంటూ సైబరాబాద్ వ్యాప్తంగా కొత్త రకం మోసానికి తెరతీశారు కేటుగాళ్లు. ఈ క్రమంలో రష్యన్ ఫెడరేషన్లో వ్యవసాయ భూమి యాజమాన్య హక్కులు, అధిక రాబడి ఇప్పిస్తామని నమ్మించి నల్లాగండ్లకు చెందిన 46 ఏళ్ల మర్చంట్ నేవీ సీమన్ నుంచి రూ. 1.10 కోట్లు కాజేసిన ఘటనపై సైబరాబాద్ సైబర్ క్రైమ్ పోలీసులు కేసు నమోదు చేశారు.
బాధితుడి తరఫున ఆయన న్యాయవాది ఫిర్యాదు చేయడంతో పోలీసులు కేసు నమోదు చేసి దర్యాప్తు ప్రారంభించారు.
మోసం జరిగిన తీరు:
- నకిలీ ప్రతిపాదనలు: బాధితుడికి నరేంద్ర కమల్ అనే వ్యక్తి పరిచయమయ్యాడు. తాను ‘యూనైటెడ్ ఫార్మింగ్ JSC-రష్యా’ మరియు ‘లెంటిల్స్ ప్లస్-ఇండియా’ సంస్థలకు డైరెక్టర్నని చెప్పుకున్నాడు. రష్యాలోని వ్యవసాయ భూములను సేకరించి అభివృద్ధి చేస్తున్నామని నమ్మబలికాడు.
- వాట్సాప్ ద్వారా నమ్మించి వల: భూముల యాజమాన్య హక్కులు, షేర్ సర్టిఫికెట్లు, సకాలంలో లాభాలు వస్తాయని వాట్సాప్ మరియు ఇతర సోషల్ మీడియా ప్లాట్ఫామ్ల ద్వారా నమ్మబలికాడు.
- రూ. 100 కోట్ల ప్రాఫిట్ ఆశ: 40 హెక్టార్ల వ్యవసాయ భూమికి సరిపడా షేర్లు కేటాయిస్తామని, 2026 మొదటి త్రైమాసికంలోనే రూ. 27.5 లక్షల రాబడి వస్తుందని, భవిష్యత్తులో లాభాలు రూ. 100 కోట్లకు చేరుతాయని ఆశ చూపడంతో బాధితుడు రూ. 1.10 కోట్లు ట్రాన్స్ఫర్ చేశాడు.
బాధితుడికి ఎదురైన అనుభవం:
డబ్బులు చెల్లించిన తర్వాత ఎన్ని నెలలు వేచి చూసినా ఎటువంటి రిజిస్ట్రేషన్ పత్రాలు గానీ, ఒప్పంద పత్రాలు గానీ అందించలేదు. రష్యా ప్రయాణాలు, వ్యాపార పనులు, ఆరోగ్య సమస్యలు అంటూ రకరకాల కారణాలు చెబుతూ కాలయాపన చేశారు. చివరకు ఏ విధమైన భూమి లేదా షేర్లు కేటాయించకపోవడంతో మోసపోయానని గ్రహించిన బాధితుడు పోలీసులను ఆశ్రయించాడు.
భారతీయ న్యాయ సంహిత (BNS) మరియు ఐటీ యాక్ట్ కింద కేసు నమోదు చేసిన సైబరాబాద్ పోలీసులు పూర్తి స్థాయి విచారణ జరుపుతున్నారు. బాధితుడి వద్ద నుంచి పూర్తి వివరాలు సేకరించేందుకు ప్రయత్నిస్తున్నారు.
ఈ వార్తకు సంబంధించిన సైబర్ నేరాల నెట్వర్క్లను పట్టుకోవడంలో సైబరాబాద్, హైదరాబాద్ పోలీసులు చేపడుతున్న చర్యలను అర్థం చేసుకోవడానికి Operation Octopus Hyderabad Cyber Crime Police Expose Fraud Network వీడియో ఉపయోగపడుతుంది.
