సమాజంలోని అన్ని రంగాల అభివృద్ధికి గురువులే ఆద్యులు

తల్లిదండ్రులతో సమానమైన దైవిక స్థానం ఉపాధ్యాయులదే

బడ్జెట్ పాఠశాలల్లో 80 శాతం మంది మహిళా సిబ్బందే

నిజామాబాద్ జిల్లాలో 60 బడ్జెట్ పాఠశాలల ద్వారా 30 వేల మంది విద్యార్థులకు నాణ్యమైన విద్య

ఉత్తమ ఉపాధ్యాయులకు బెస్ట్ టీచర్ అవార్డులు అభినందనీయం

బడ్జెట్ స్కూల్ యాజమాన్యాలు, ఉపాధ్యాయులకు కుటుంబ సభ్యుడిగా అండగా ఉంటా: ఎమ్మెల్యే వేముల ప్రశాంత్ రెడ్డి

మోర్తాడ్, సెప్టెంబర్ 13:(E6tv NEWS: ప్రతినిధి)

సమాజ నిర్మాణంలో ఉపాధ్యాయుల పాత్ర అమూల్యమైనదని, తల్లిదండ్రులతో సమానంగా గురువులకు సమాజంలో అత్యున్నత స్థానం ఉందని బాల్కొండ ఎమ్మెల్యే, మాజీ మంత్రి వేముల ప్రశాంత్ రెడ్డి అన్నారు. ఆదివారం మోర్తాడ్ మండల కేంద్రంలోని ఆర్‌ఎన్‌బీ ఫంక్షన్ హాల్‌లో B-SMAT (Budget School Management Association of Telangana) ఆధ్వర్యంలో నిర్వహించిన ‘గురు పూజోత్సవం’ కార్యక్రమానికి ఆయన ముఖ్య అతిథిగా హాజరై ప్రసంగించారు.

ఉపాధ్యాయులు కేవలం పాఠాలు బోధించే వ్యక్తులు కాదని, విద్యార్థుల భవిష్యత్తును తీర్చిదిద్దే శిల్పులని ఎమ్మెల్యే పేర్కొన్నారు. మాతృదేవోభవ, పితృదేవోభవ, ఆచార్యదేవోభవ అనే భావన మన సంస్కృతిలో ఉపాధ్యాయులకు ఉన్న ప్రత్యేక స్థానాన్ని తెలియజేస్తుందని అన్నారు.చిన్నారి పాఠశాలలో చేరే సమయంలో ప్రపంచం గురించి పెద్దగా అవగాహన ఉండదని, అలాంటి పసిమనసులకు క్రమశిక్షణ, జ్ఞానం, మంచి నడవడికను నేర్పించే గురువులు వారి జీవితాలపై చెరగని ముద్ర వేస్తారని తెలిపారు. శాస్త్రవేత్తలు, వైద్యులు, ఇంజనీర్లు, రాజకీయ నాయకులు మొదలుకొని ముఖ్యమంత్రులు, ప్రధానమంత్రుల వరకు ప్రతి ఒక్కరూ ఏదో ఒక దశలో ఉపాధ్యాయుల వద్ద విద్యను అభ్యసించినవారేనని గుర్తుచేశారు. అన్ని రంగాల అభివృద్ధికి గురువులే ఆద్యులని కొనియాడారు.

బడ్జెట్ పాఠశాలల సేవలు అభినందనీయం

బడ్జెట్ స్కూల్ మేనేజ్‌మెంట్ అసోసియేషన్, బడ్జెట్ పాఠశాలల వ్యవస్థపై ఎమ్మెల్యే ప్రత్యేకంగా మాట్లాడారు. విద్య, వైద్యం, మౌలిక సదుపాయాలు కల్పించడంలో ప్రభుత్వాలకు బాధ్యత ఉన్నప్పటికీ, విద్యారంగంలో ప్రైవేట్ రంగం కూడా కీలక పాత్ర పోషిస్తోందన్నారు.ప్రైవేట్ విద్యా రంగంలో భారీ కార్పొరేట్ విద్యాసంస్థలతో పాటు మధ్యతరగతి, దిగువ మధ్యతరగతి కుటుంబాల పిల్లలకు విద్యను అందిస్తున్న బడ్జెట్ పాఠశాలలు కూడా ఉన్నాయని చెప్పారు. కార్పొరేట్ పాఠశాలలకు దీటుగా గ్రామీణ ప్రాంతాల్లో బడ్జెట్ పాఠశాలలు విద్యను విస్తరిస్తున్నాయని ప్రశంసించారు.

బడ్జెట్ పాఠశాలలు కేవలం వ్యాపార దృక్పథంతో కాకుండా, యాజమాన్యాలు తాము ఉపాధి పొందడంతో పాటు అనేక మంది ఉపాధ్యాయులు, సిబ్బందికి ఉపాధి కల్పిస్తూ సమాజానికి సేవ చేస్తున్న వ్యవస్థగా కొనసాగుతున్నాయని అన్నారు.

60 పాఠశాలల్లో 30 వేల మంది విద్యార్థులు

నిజామాబాద్ జిల్లా బడ్జెట్ స్కూల్ అసోసియేషన్ పరిధిలో సుమారు 60 పాఠశాలలు ఉన్నాయని, వాటిలో దాదాపు 30 వేల మంది విద్యార్థులు విద్యనభ్యసిస్తున్నారని ఎమ్మెల్యే తెలిపారు. ఈ పాఠశాలల్లో సుమారు 2,500 నుంచి 3,000 మంది ఉపాధ్యాయ, ఉపాధ్యాయేతర సిబ్బంది ఉపాధి పొందుతున్నారని పేర్కొన్నారు.బడ్జెట్ పాఠశాలల్లో పనిచేస్తున్న టీచింగ్, నాన్‌టీచింగ్ సిబ్బందిలో దాదాపు 80 శాతం మంది మహిళలే ఉన్నారని, వారి కుటుంబాల ఆర్థిక నిర్వహణకు ఉపాధ్యాయ వృత్తి ఎంతో దోహదపడుతోందని అన్నారు.

ఉత్తమ ఉపాధ్యాయులకు సత్కారం

ప్రతి పాఠశాల నుంచి ఉత్తమ ప్రతిభ కనబరిచిన ఇద్దరు ఉపాధ్యాయులను ఎంపిక చేసి ‘బెస్ట్ టీచర్’ అవార్డులతో సత్కరించడం అభినందనీయమని వేముల ప్రశాంత్ రెడ్డి అన్నారు. ఇలాంటి అవార్డులు ఉపాధ్యాయుల్లో మరింత ఉత్సాహాన్ని నింపుతాయని తెలిపారు.విద్యార్థులను ఉత్తమ పౌరులుగా తీర్చిదిద్దినప్పుడే సమాజం, తద్వారా దేశం అభివృద్ధి చెందుతుందని, ఆ గొప్ప భవిష్యత్తుకు ఉపాధ్యాయులే అసలైన పునాది అని స్పష్టం చేశారు. బడ్జెట్ స్కూల్ యాజమాన్యాలు, ఉపాధ్యాయుల సంక్షేమం కోసం తాను ఎల్లప్పుడూ కుటుంబ సభ్యుడిగా అండగా ఉంటానని, వారి సమస్యల పరిష్కారానికి తన వంతు కృషి చేస్తానని హామీ ఇచ్చారు.

కార్యక్రమంలో చిన్నారులు నిర్వహించిన సాంస్కృతిక కార్యక్రమాలు ఆకట్టుకున్నాయి. విద్యార్థుల ప్రతిభను ఎమ్మెల్యే అభినందించారు.

ఈ కార్యక్రమంలో B-SMAT రాష్ట్ర అధ్యక్షుడు శ్రీపతి శేఖర్ రెడ్డి, ఫౌండర్ షఫీ, జిల్లా అధ్యక్షుడు నంబుల గిరి, సెక్రటరీ రవీందర్, కోశాధికారి హరీష్తో పాటు B-SMAT పాఠశాలల యాజమాన్యాలు, ఉపాధ్యాయులు, సిబ్బంది తదితరులు పాల్గొన్నారు.