– సామాజిక రాజకీయ విశ్లేషకుడు వడ్డేపల్లి మల్లేశం.
E6tv NEWS-ప్రత్యేక కథనం.
సమాజంలో అభివృద్ధి అంటే కేవలం రోడ్లు, భవనాలు, విద్య, వైద్యం, సాంకేతిక రంగాల అభివృద్ధి మాత్రమే కాదని.. మానవ వికాసం, మానవీయ విలువలు, ఆలోచనా విధానంలో మార్పు వచ్చినప్పుడే నిజమైన సామాజిక ప్రగతి సాధ్యమవుతుందని సామాజిక రాజకీయ విశ్లేషకుడు వడ్డేపల్లి మల్లేశం పేర్కొన్నారు. “ఇప్పుడు పొలాల కంటే మిన్నగా మనుషుల మెదళ్లను దున్నాలి” అనే ఆలోచనను సమాజం ముందుకు తీసుకెళ్లాల్సిన అవసరం ఉందన్నారు.
సమాజంలో అసమానతలు, అంతరాలు తొలగిపోవాలని, స్వార్థ చింతనకు అతీతంగా నైతిక విలువలతో, విశ్వ మానవ భావనతో ప్రజలు జీవించాలని ప్రతి ఒక్కరూ కోరుకుంటున్నారని తెలిపారు. అయితే ఆచరణలో మాత్రం అసూయ, ద్వేషం, కక్షలు, స్వార్థం, మూఢనమ్మకాలు, అమానవీయ సంబంధాలు పెరుగుతున్నాయని ఆవేదన వ్యక్తం చేశారు.
ప్రభుత్వాలు విద్య, వైద్యం, తాగునీరు, రవాణా, వ్యవసాయం, పశుపోషణ, రోడ్లు, భవనాలు తదితర అనేక రంగాల్లో అభివృద్ధి కార్యక్రమాలు చేపడుతున్నప్పటికీ.. సమాజంలో కొనసాగుతున్న కొన్ని రుగ్మతలు మానవ వికాసానికి అడ్డంకిగా మారుతున్నాయని పేర్కొన్నారు. మద్యం, ధూమపానం, మాదకద్రవ్యాలు, అనారోగ్యకరమైన వినోద సంస్కృతి వంటి అంశాలు ముఖ్యంగా యువతపై ప్రభావం చూపుతున్నాయని అన్నారు.
భూమిని దున్నినట్లే.. మెదళ్లను కూడా దున్నాలి
భూమి గట్టిపడితే పంటలు సరిగా పండవని, దాన్ని దున్ని వదులుగా చేసి సారవంతమైన నేలగా మార్చినప్పుడే పంటలకు అవసరమైన పోషకాలు అందుతాయని వివరించారు. అదే విధంగా సంకుచిత ఆలోచనలు, మూఢనమ్మకాలు, అసూయ, ద్వేషం, స్వార్థంతో గట్టిపడిన మనుషుల ఆలోచనా విధానాన్ని కూడా మార్చాల్సిన అవసరం ఉందన్నారు.సామాజిక సాహితీవేత్త కత్తి పద్మారావు పేర్కొన్న “భూమిని దున్నాల్సిందే.. పంటలు పండించాల్సిందే.. అంతకుమించిన స్థాయిలో మనుషుల మెదళ్లను కూడా దున్నాలి” అనే భావన సామాజిక మార్పుకు ఎంతో ప్రాధాన్యమైనదని మల్లేశం పేర్కొన్నారు.
కుటుంబాల నుంచే మార్పు ప్రారంభం కావాలి
కుటుంబ సభ్యులు, బంధువులు, సమాజంలోని వివిధ వర్గాల మధ్య అమానవీయ సంబంధాలు పెరగడం ఆందోళన కలిగిస్తోందన్నారు. అవమానాలు, కక్షలు, ఘర్షణలు, పరస్పర ద్వేషాలు చివరకు కుటుంబాలు విచ్ఛిన్నం కావడానికి, హత్యలు, ఆత్మహత్యలు, దాడులు వంటి దారుణాలకు దారితీస్తున్నాయని తెలిపారు.ఆర్థిక అసమానతలు, ఆధిపత్య ధోరణులు కూడా సామాజిక అంతరాలను పెంచుతున్నాయని అన్నారు. మరోవైపు మద్యం, ధూమపానం, డ్రగ్స్ వంటి వ్యసనాలు పేద, మధ్యతరగతి కుటుంబాల ఆర్థిక పరిస్థితిని మరింత దెబ్బతీస్తున్నాయని పేర్కొన్నారు.
విద్యతో పాటు మానవీయ విలువలు అవసరం
కేవలం డిగ్రీలు, సాంకేతిక నైపుణ్యాలు సాధించడం వల్లనే సమాజంలో మార్పు రాదని మల్లేశం అన్నారు. విద్యార్థుల్లో మానవీయ విలువలు, సామాజిక బాధ్యత, శాస్త్రీయ దృక్పథం, సమానత్వ భావన పెంపొందించేలా విద్యా విధానంలో మార్పులు రావాల్సిన అవసరం ఉందన్నారు.యువతకు ప్రత్యేక శిక్షణ, నైపుణ్యాభివృద్ధి కార్యక్రమాలు నిర్వహించడంతో పాటు వారి ఆసక్తి, ప్రతిభకు అనుగుణంగా అవకాశాలు కల్పించాలని సూచించారు. పాఠశాలలు, కళాశాలల్లో సాహిత్యం, కళలు, నాటకాలు, చర్చలు, సదస్సుల ద్వారా సామాజిక సమస్యలపై అవగాహన కల్పించాలని అన్నారు.
మేధావులు, కళాకారుల పాత్ర కీలకం
సమాజంలో మార్పు తీసుకురావడంలో కవులు, కళాకారులు, రచయితలు, మేధావులు, సామాజికవేత్తలు, మానసిక నిపుణుల పాత్ర కీలకమని పేర్కొన్నారు. ప్రజల ఆలోచనలను కదిలించే కళారూపాలు, సాహిత్యాన్ని విస్తృతంగా ప్రోత్సహించాల్సిన అవసరం ఉందన్నారు.ప్రజాస్వామ్యం బలపడాలంటే జాగరూకమైన పౌర సమాజం అవసరమని డాక్టర్ బి.ఆర్. అంబేద్కర్ చెప్పిన విషయాన్ని గుర్తుచేశారు. స్వార్థ ప్రయోజనాలకు అతీతంగా ప్రతి ఒక్కరూ సామాజిక బాధ్యతను గుర్తించి ముందుకు రావాలని పిలుపునిచ్చారు.
ప్రపంచంలోనే యువత అధికంగా ఉన్న దేశంగా భారత్లో యువతను సక్రమ మార్గంలో నడిపించేందుకు ప్రభుత్వం, తల్లిదండ్రులు, విద్యాసంస్థలు, సామాజిక సంస్థలు సమిష్టిగా కృషి చేయాలని సూచించారు. మనుషుల ఆలోచనా విధానంలో మార్పు తీసుకురాగలిగినప్పుడే సమాజంలో నిజమైన అభివృద్ధి, సమానత్వం, మానవీయ విలువలు వికసిస్తాయని వడ్డేపల్లి మల్లేశం పేర్కొన్నారు.
