దేశంలో ద్రవ్యోల్బణం (Retail Inflation) మళ్ళీ పెరిగింది. ఆగస్టు 2026 నెలకు సంబంధించిన వినియోగదారుల ధరల సూచీ (CPI) ఆధారిత రిటైల్ ద్రవ్యోల్బణ గణాంకాలను కేంద్ర గణాంకాల శాఖ (MoSPI) సోమవారం విడుదల చేసింది. జాతీయ స్థాయిలో రిటైల్ ద్రవ్యోల్బణం 4.82 శాతానికి చేరగా, దేశంలోనే అత్యధికంగా 6.27 శాతంతో తెలంగాణ రాష్ట్రం ప్రథమ స్థానంలో నిలిచింది.
తెలంగాణ తర్వాత తమిళనాడు (5.92%), మధ్యప్రదేశ్ (5.55%), ఆంధ్రప్రదేశ్ (5.53%), ఒడిశా (5.52%) తదుపరి స్థానాల్లో ఉన్నాయి. మిజోరం అతి తక్కువగా 2.35% ద్రవ్యోల్బణాన్ని నమోదు చేసింది.
జాతీయ స్థాయి ముఖ్యాంశాలు & కూరగాయల మంట
- గ్రామీణ ప్రాంతాల్లోనే ఎక్కువ: జాతీయ స్థాయిలో గ్రామీణ ద్రవ్యోల్బణం 5.23 శాతంగా నమోదవగా, పట్టణ ప్రాంతాల్లో 4.31 శాతంగా ఉంది. మే నెల నుంచి (3.93%) వరుసగా నాలుగో నెల కూడా ద్రవ్యోల్బణం క్రమంగా పెరుగుతూ వచ్చింది.
- ఆహార ద్రవ్యోల్బణం పెంపు: ఆహార పదార్థాల ధరల పెరుగుదలే దీనికి ప్రధాన కారణం. జులైలో 5.52 శాతంగా ఉన్న ఆహార ద్రవ్యోల్బణం ఆగస్టులో 5.95 శాతానికి పెరిగింది. గ్రామీణ ప్రాంతాల్లో ఇది ఏకంగా 6.13 శాతానికి చేరింది.
- ఉల్లి, అల్లం ధరల ఆకాశాన: ఆగస్టులో ఉల్లి ద్రవ్యోల్బణం ఒక్కసారిగా 48.27% (జులైలో 22.54%) కి రెట్టింపైంది. అల్లం ధరలు 73.82%, వెల్లుల్లి 43.60% పెరిగాయి.
- వెండి, బంగారం జోరు: ఇక వస్తువుల పరంగా వెండి ఆభరణాల ధరలు ఏకంగా 107.11% పెరుగుదలతో గరిష్ఠ స్థాయికి చేరగా, బంగారం మరియు ప్లాటినం ఆభరణాల ద్రవ్యోల్బణం 35.53 శాతంగా నమోదైంది.
