సాంప్రదాయ పండుగలు భావితరాలకు ప్రేరణ – సర్పంచ్ అశోక్ పటేల్

మేనూర్, అక్టోబర్ 9:(E6tv NEWS: ప్రతినిధి).

కామారెడ్డి జిల్లా మద్దూర్ మండలం మేనూర్ గ్రామంలోని ప్రభుత్వ ఉన్నత, ప్రాథమిక పాఠశాలల్లో శుక్రవారం బతుకమ్మ వేడుకలు కన్నులపండువగా జరిగాయి. పాఠశాల ఉపాధ్యాయుల ఆధ్వర్యంలో నిర్వహించిన ఈ వేడుకలకు గ్రామ సర్పంచ్ అశోక్ పటేల్ ముఖ్య అతిథిగా హాజరై జ్యోతి ప్రజ్వలన చేసి కార్యక్రమాన్ని ప్రారంభించారు.

ఈ సందర్భంగా సర్పంచ్ అశోక్ పటేల్ మాట్లాడుతూ.. బతుకమ్మ పండుగ తెలంగాణ సంస్కృతి, సంప్రదాయాలకు ప్రతీక అని పేర్కొన్నారు. ప్రకృతిని పూజించే ఈ పూల పండుగకు ఎంతో విశిష్టత ఉందని, ముఖ్యంగా మహిళలు, బాలికలకు బతుకమ్మ పండుగ ప్రత్యేకమైనదని తెలిపారు.

విద్యార్థులకు పుస్తక జ్ఞానంతో పాటు మన సంస్కృతి, సంప్రదాయాలు, పండుగల ప్రాధాన్యతపై అవగాహన కల్పించడం అవసరమన్నారు. ఇలాంటి కార్యక్రమాలు విద్యార్థుల్లో సాంస్కృతిక విలువలను పెంపొందించడంతో పాటు మన సంప్రదాయాలను భావితరాలకు అందించేందుకు దోహదపడతాయని పేర్కొన్నారు. పాఠశాలల్లో సంప్రదాయ పండుగలను నిర్వహిస్తున్న ఉపాధ్యాయులను అభినందించారు.

అలరించిన కోలాటాలు.. ఆటపాటలు

పాఠశాల ఆవరణలో విద్యార్థినులు, ఉపాధ్యాయులు వివిధ రకాల రంగురంగుల పూలతో బతుకమ్మలను అందంగా పేర్చారు. వాటి చుట్టూ చేరి బతుకమ్మ పాటలు పాడుతూ, కోలాటాలు ఆడుతూ ఉత్సాహంగా వేడుకల్లో పాల్గొన్నారు. విద్యార్థినుల ఆటపాటలు, సందడి పాఠశాల ప్రాంగణంలో పండుగ వాతావరణాన్ని నింపాయి.

సంప్రదాయాల పరిరక్షణ అందరి బాధ్యత

బతుకమ్మ తెలంగాణ సంస్కృతి, మహిళల గౌరవానికి ప్రతీక అని సర్పంచ్ అశోక్ పటేల్ అన్నారు. విద్యార్థులు ఇలాంటి సంప్రదాయ వేడుకల్లో పాల్గొంటూ మన సంస్కృతి, సంప్రదాయాలను కాపాడి భావితరాలకు అందించాలని పిలుపునిచ్చారు.ఈ కార్యక్రమంలో గ్రామ సర్పంచ్ అశోక్ పటేల్, పంచాయతీ కార్యదర్శి హరీష్ కుమార్, పాఠశాలల ప్రధానోపాధ్యాయులు, ఉపాధ్యాయ బృందం, పాఠశాల యాజమాన్య కమిటీ (SMC) సభ్యులు, గ్రామ పెద్దలు, విద్యార్థులు పెద్ద సంఖ్యలో పాల్గొన్నారు.

ఈ కార్యక్రమంలో గ్రామ సర్పంచ్ అశోక్ పటేల్, పంచాయతీ కార్యదర్శి హరీష్ కుమార్, పాఠశాలల ప్రధానోపాధ్యాయులు, ఉపాధ్యాయ బృందం, పాఠశాల యాజమాన్య కమిటీ (SMC) సభ్యులు, గ్రామ పెద్దలు, విద్యార్థులు పెద్ద సంఖ్యలో పాల్గొన్నారు.