త్వరలో ఏరోస్పేస్ అండ్ డిఫెన్స్ పాలసీ 2.0 విడుదల
రక్షా ఎక్స్‌పో 2026 కర్టెన్ రైజర్ ప్రారంభించిన సీఎం రేవంత్ రెడ్డి
హైదరాబాద్, అక్టోబర్ 25 (E6tv న్యూస్).
రక్షణ రంగంలో భారతదేశాన్ని ప్రపంచంలోనే శక్తివంతమైన, అగ్రగామి దేశంగా తీర్చిదిద్దేందుకు పారిశ్రామికవేత్తలు, పరిశ్రమల ప్రతినిధులు సమష్టిగా కృషి చేయాలని ముఖ్యమంత్రి ఎ. రేవంత్ రెడ్డి పిలుపునిచ్చారు. తెలంగాణను దేశ రక్షణ రంగ పరిశ్రమలకు అతిపెద్ద పారిశ్రామిక కేంద్రంగా అభివృద్ధి చేయడమే లక్ష్యమని స్పష్టం చేశారు. తెలంగాణ రైజింగ్ 2047 దార్శనికతకు అనుగుణంగా త్వరలోనే ఏరోస్పేస్ అండ్ డిఫెన్స్ పాలసీ 2.0ను విడుదల చేయనున్నట్లు వెల్లడించారు.
ఇన్వెస్ట్ తెలంగాణ గ్లోబల్ సమ్మిట్‌లో భాగంగా హైదరాబాద్‌లోని తాజ్ ఫలక్‌నుమా ప్యాలెస్‌లో నిర్వహించిన కార్యక్రమంలో ముఖ్యమంత్రి రక్షా ఎక్స్‌పో 2026 కర్టెన్ రైజర్‌ను ప్రారంభించి, ఎక్స్‌పో లోగోను ఆవిష్కరించారు. ఈ సందర్భంగా రక్షణ, అంతరిక్ష, ఏరోస్పేస్, సైబర్ సెక్యూరిటీ, కృత్రిమ మేధస్సు, డ్రోన్ టెక్నాలజీ రంగాలకు చెందిన ప్రముఖ సంస్థల ప్రతినిధులతో సమావేశమయ్యారు.
ఈ సందర్భంగా సీఎం మాట్లాడుతూ, భారతదేశం రక్షణ అవసరాల కోసం సాంకేతిక పరిజ్ఞానాన్ని దిగుమతి చేసుకునే స్థాయి నుంచి స్వదేశీ సాంకేతికతతో ఉత్పత్తులు తయారు చేయడమే కాకుండా, రక్షణ సాంకేతికతను ఇతర దేశాలకు ఎగుమతి చేసే స్థాయికి ఎదగాలని ఆకాంక్షించారు. ఈ లక్ష్య సాధనలో తెలంగాణ కీలక పాత్ర పోషించేందుకు అన్ని విధాలా సిద్ధంగా ఉందన్నారు.తెలంగాణలో పెట్టుబడులు పెట్టేందుకు ఇప్పటికే రూపొందించుకున్న ప్రణాళికలను పారిశ్రామికవేత్తలు రెట్టింపు చేయాలని సీఎం కోరారు. రాష్ట్రంలో పరిశ్రమల స్థాపనకు అవసరమైన సహకారం అందించేందుకు ప్రభుత్వం సిద్ధంగా ఉందని, పెట్టుబడిదారులకు అనుకూలమైన వాతావరణాన్ని కల్పిస్తామని హామీ ఇచ్చారు.
2047 నాటికి 3 ట్రిలియన్ డాలర్ల ఆర్థిక వ్యవస్థే లక్ష్యం
తెలంగాణను 2034 నాటికి ఒక ట్రిలియన్ డాలర్ల ఆర్థిక శక్తిగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా తీర్చిదిద్దాలనే లక్ష్యంతో గతేడాది తెలంగాణ రైజింగ్ 2047 విజన్ డాక్యుమెంట్‌ను విడుదల చేసినట్లు ముఖ్యమంత్రి తెలిపారు. ప్రస్తుతం దేశ జీడీపీలో తెలంగాణ వాటా సుమారు ఐదు శాతంగా ఉందని, 2047 నాటికి ఈ వాటాను పది శాతానికి పెంచాలని లక్ష్యంగా పెట్టుకున్నట్లు చెప్పారు.ఈ లక్ష్య సాధనలో రక్షణ ఉత్పత్తుల తయారీ, ఏరోస్పేస్, అంతరిక్ష పరిశోధనలు, సైబర్ భద్రత, కృత్రిమ మేధస్సు, డ్రోన్ సాంకేతికత వంటి రంగాలు కీలక పాత్ర పోషిస్తాయని వివరించారు. ఈ రంగాల్లో పరిశోధనలు, నూతన ఆవిష్కరణలు, ఆధునిక సాంకేతిక పరిజ్ఞానం అభివృద్ధికి రక్షా ఎక్స్‌పో అంతర్జాతీయ వేదికగా నిలుస్తుందని ఆశాభావం వ్యక్తం చేశారు.
భవిష్యత్తు యుద్ధాల్లో సాంకేతికతే కీలకం
భవిష్యత్తులో యుద్ధ స్వరూపం పూర్తిగా మారిపోనుందని సీఎం రేవంత్ రెడ్డి పేర్కొన్నారు. డ్రోన్లు, రోబోట్లు, కృత్రిమ మేధస్సుతో పనిచేసే వ్యవస్థలు యుద్ధ రంగంలో కీలకంగా మారనున్నాయని తెలిపారు. ఈ నేపథ్యంలో రక్షణ రంగంలో సాంకేతిక స్వావలంబన సాధించేందుకు పరిశోధనలు, ఆవిష్కరణలకు ప్రాధాన్యం ఇవ్వాలని సూచించారు.భారత రక్షణ రంగంలో హైదరాబాద్‌కు వ్యూహాత్మక ప్రాధాన్యం ఉందని, నగరం అనేక కీలక పరిశోధనా సంస్థలకు కేంద్రంగా నిలుస్తోందని చెప్పారు. భారత సైన్యం, వైమానిక దళాలకు సంబంధించిన కీలక వ్యవస్థలతో పాటు రక్షణ ఉత్పత్తుల తయారీ సంస్థలు కూడా ఇక్కడ ఉన్నాయని వివరించారు. తెలంగాణలోని వికారాబాద్ జిల్లా దామగుండం రిజర్వ్ ఫారెస్ట్‌లో నౌకాదళానికి అవసరమైన అత్యంత తక్కువ పౌనఃపున్యాల (VLF) రాడార్ కేంద్రం నిర్మాణం జరుగుతోందని ప్రస్తావించారు.
ప్రముఖ రక్షణ సంస్థల ప్రతినిధుల హాజరు
రక్షా ఎక్స్‌పో 2026ను రక్షణ రంగంలోని అన్ని భాగస్వాములు ఒకే వేదికపై సమావేశమై తమ ఆలోచనలు పంచుకునే, పరస్పర సహకారాన్ని పెంపొందించుకునే అంతర్జాతీయ వేదికగా తీర్చిదిద్దాలని ప్రభుత్వం భావిస్తోందని సీఎం తెలిపారు. డీఆర్‌డీఓ, హెచ్‌ఏఎల్, బీడీఎల్, మిధాని, టాటా సంస్థలు, ఎయిర్‌బస్, సాఫ్రాన్, స్కైరూట్, లాక్‌హీడ్ మార్టిన్, భారత్ ఫోర్జ్ తదితర సంస్థల ప్రతినిధులు ఈ సమావేశంలో పాల్గొన్నారు.
ఈ కార్యక్రమంలో ఉప ముఖ్యమంత్రి మల్లు భట్టి విక్రమార్క, మంత్రులు ఎన్. ఉత్తమ్ కుమార్ రెడ్డి, దుద్దిళ్ల శ్రీధర్ బాబు, ప్రభుత్వ ప్రధాన కార్యదర్శి సంజయ్ జాజు, డీజీపీ సీవీ ఆనంద్, హోంశాఖ కార్యదర్శి శిఖా గోయల్ తదితరులు పాల్గొన్నారు. భారత్ ఫోర్జ్ సీఎండీ బాబా ఎన్. కల్యాణి, స్కైరూట్ సీఈఓ పవన్ కుమార్ చందన, డీఆర్‌డీఓ మాజీ చైర్మన్ డాక్టర్ డి. సతీష్ రెడ్డి, లాక్‌హీడ్ మార్టిన్ ప్రతినిధి మైకెల్ ఫెర్నాండెజ్, ధ్రువ స్పేస్ సహ వ్యవస్థాపకుడు సంజయ్ నెక్కంటి, సాఫ్రాన్ ప్రతినిధి జితేంద్ర గవాంకర్, ఎయిర్‌బస్ డిఫెన్స్ స్పేస్ ప్రతినిధి వెంకట్ కట్కూరి సహా పలువురు ప్రముఖులు హాజరయ్యారు. అమెరికా కాన్సులేట్ జనరల్ (హైదరాబాద్) ప్రతినిధి లారా విలియమ్స్‌తో పాటు రక్షణ శాఖకు చెందిన సీనియర్, మాజీ ఉన్నతాధికారులు కూడా పాల్గొన్నారు.
వచ్చే డిసెంబర్ 7, 8, 9 తేదీల్లో హైదరాబాద్‌లోని భారత్ ఫ్యూచర్ సిటీలో నిర్వహించనున్న రెండో ఇన్వెస్ట్ తెలంగాణ గ్లోబల్ సమ్మిట్‌కు హాజరుకావాలని ముఖ్యమంత్రి పారిశ్రామికవేత్తలను ఆహ్వానించారు. తెలంగాణను రక్షణ రంగ పెట్టుబడులకు ప్రధాన గమ్యస్థానంగా మార్చేందుకు పరిశ్రమల భాగస్వామ్యం ఎంతో అవసరమని ఆయన పేర్కొన్నారు.
