ఆంధ్రప్రదేశ్‌లో వాతావరణం మళ్లీ మారబోతోంది. దక్షిణ కోస్తాంధ్ర, దాని పరిసర ప్రాంతాల్లో సగటు సముద్ర మట్టానికి 5.8 నుండి 7.6 కిలోమీటర్ల ఎత్తులో ఉపరితల ఆవర్తనం కొనసాగుతుండటంతో రాగల మూడు రోజుల పాటు (నెక్స్ట్ 72 అవర్స్) రాష్ట్రవ్యాప్తంగా వర్షాలు కురిసే అవకాశం ఉందని అమరావతి వాతావరణ కేంద్రం వెల్లడించింది. కోస్తాంధ్ర, రాయలసీమ ప్రాంతాల్లో గంటకు 30 నుండి 40 కిలోమీటర్ల వేగంతో ఈదురుగాలులు వీచే ప్రమాదం ఉందని అధికారులు అలర్ట్ జారీ చేశారు.
ప్రాంతాల వారీగా వాతావరణ అంచనా:
- కోస్తాంధ్ర – యానాం: శని, ఆది మరియు సోమవారాల్లో అక్కడక్కడా తేలికపాటి నుండి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి రెండు చోట్ల ఉరుములు, మెరుపులతో పాటు బలమైన ఈదురుగాలులు వీస్తాయి.
- రాయలసీమ: శని, ఆదివారాల్లో అక్కడక్కడా మోస్తరు జల్లులు పడే వీలుంది. సోమవారం నాటికి వర్ష తీవ్రత పెరిగి ఉరుములు, మెరుపులతో కూడిన వర్షాలు కురిసే అవకాశం ఉందని వాతావరణ శాఖ తెలిపింది.
వర్షాలు, బలమైన ఈదురుగాలుల నేపథ్యంలో రైతులు, పొలం పనుల్లో ఉండే కూలీలు మరియు లోతట్టు ప్రాంత ప్రజలు అప్రమత్తంగా ఉండి తగిన జాగ్రత్తలు తీసుకోవాలని అధికారులు సూచించారు.
