డెమోక్రటిక్ రిపబ్లిక్ ఆఫ్ కాంగోను ప్రాణాంతక ఎబోలా మహమ్మారి వణికిస్తోంది. మే 15న తూర్పు కాంగోలో వెలుగుచూసిన ఈ బుండిబుగ్యో వైరస్ వ్యాప్తి రోజురోజుకీ ఉధృతమవుతూ దేశ చరిత్రలోనే అత్యంత తీవ్రమైన ఎబోలా సంక్షోభంగా మారింది. ఇప్పటివరకు 8,300 మందికి పైగా ఈ వ్యాధి బారిన పడగా, మృతుల సంఖ్య ఏకంగా 4,018కి చేరిందని ప్రభుత్వ నివేదికలు స్పష్టం చేస్తున్నాయి. ఇటూరి, నార్త్ కివు ప్రావిన్సులతో పాటు మొత్తం ఏడు ప్రావిన్సులకు ఈ వైరస్ విస్తరించడంతో పరిస్థితులు ఆందోళనకరంగా మారాయి.
మరోవైపు కాంగోలో వైరస్ నిరోధక చర్యలకు తీవ్ర అంతరాయాలు ఎదురవుతున్నాయి. రవాణా సదుపాయాలు లేని మారుమూల ప్రాంతాలు, శాంతిభద్రతల సమస్యలు, స్థానికుల్లో ఆరోగ్య సిబ్బందిపై అపోహలకు తోడు, వేతనాలు అందక ఫ్రంట్‌లైన్ వైద్య సిబ్బంది ఆందోళనలు చేపట్టడం ప్రతిబంధకంగా మారింది. అలాగే ఇటూరిలోని ప్రధాన చికిత్స కేంద్రం అగ్నిప్రమాదానికి గురికావడం, నిరంతరాయంగా విధి నిర్వహణలో ఉంటూ 50 మందికి పైగా ఆరోగ్య సిబ్బంది ప్రాణాలు కోల్పోవడం పరిస్థితి తీవ్రతకు అద్దం పడుతోంది. బాధితులను గుర్తించే చర్యలు కొనసాగుతున్నప్పటికీ, సరిహద్దు దేశాలు కూడా తీవ్ర అప్రమత్తత పాటిస్తున్నాయి.
