తెల్లవారుజాము 3 గంటల నుంచి అర్ధరాత్రి దాటినా మద్యం విక్రయాలా?
బాటిల్‌పై రూ.20 నుంచి రూ.50 వరకు అదనపు వసూళ్ల ఆరోపణలు
మహిళా ప్రయాణికులు, విద్యార్థులకు ఇబ్బందులు.. ఇరిగేషన్‌ స్థలాల నిర్మాణాలపైనా ప్రశ్నలు
వర్ని, అక్టోబర్ 22 (E6tv న్యూస్).
నిజామాబాద్‌ జిల్లా వర్ని బస్టాండ్‌ పరిసర ప్రాంతాల్లో బెల్ట్‌ షాపుల నిర్వహణపై స్థానిక ప్రజలు, ప్రయాణికులు ఆందోళన వ్యక్తం చేస్తున్నారు. బస్టాండ్‌ ప్రాంగణానికి ఆనుకొని సుమారు ఐదు వరకు బెల్ట్‌ షాపుల్లో మద్యం విక్రయాలు జరుగుతున్నాయని, ఉదయం 3 గంటల నుంచి రాత్రి 1 గంట వరకు విక్రయాలు కొనసాగుతున్నాయని స్థానికులు ఆరోపిస్తున్నారు. బస్టాండ్‌ సమీపంలోనే మద్యం విక్రయాలు జరుగుతుండటంతో ప్రయాణికులు, మహిళలు, విద్యార్థులు ఇబ్బందులు ఎదుర్కొంటున్నారని చెబుతున్నారు.
మద్యం సీసాపై అదనపు వసూళ్ల ఆరోపణలు!
బెల్ట్‌ షాపుల్లో మద్యం సీసాలపై రూ.20 నుంచి రూ.50 వరకు అదనంగా వసూలు చేస్తున్నారని మద్యం కొనుగోలుదారులు ఆరోపిస్తున్నారు. నిర్ణీత ధరకు మించి డబ్బులు వసూలు చేస్తూ మద్యం ప్రియుల జేబులకు చిల్లులు పెడుతున్నారని విమర్శిస్తున్నారు. ఈ విక్రయాలకు సంబంధించిన ధరలు, అనుమతులు, పని వేళలపై ఎక్సైజ్‌ అధికారులు తనిఖీలు నిర్వహించి వాస్తవాలను వెల్లడించాలని స్థానికులు కోరుతున్నారు.
మహిళలు, విద్యార్థులకు తప్పని ఇబ్బందులు!
వర్ని బస్టాండ్‌ నుంచి వడ్డేపల్లి ప్రాంతంలోని ఆసుపత్రులు, కళాశాలలు, పాఠశాలలు, ప్రభుత్వ కార్యాలయాలకు ప్రతిరోజూ అనేకమంది రాకపోకలు సాగిస్తుంటారు. బస్టాండ్‌ సమీపంలో మద్యం విక్రయాలు, మద్యం సేవించిన కొందరి ప్రవర్తన వల్ల మహిళా ప్రయాణికులు, విద్యార్థులు అసౌకర్యానికి గురవుతున్నారని స్థానికులు పేర్కొంటున్నారు. బస్టాండ్‌ పరిసరాల్లో ప్రశాంతమైన వాతావరణం కల్పించేందుకు సంబంధిత శాఖలు చర్యలు తీసుకోవాలని విజ్ఞప్తి చేస్తున్నారు.
ఏళ్లుగా కొనసాగుతున్నాయా?
బెల్ట్‌ షాపుల్లో మద్యం విక్రయాలు చాలాకాలంగా కొనసాగుతున్నాయని, వైన్‌ షాపుల నిర్వాహకులతో సిండికేట్‌ ఏర్పడిందనే ఆరోపణలు కూడా వినిపిస్తున్నాయి. అయితే, ఈ ఆరోపణలపై అధికారిక నిర్ధారణ రావాల్సి ఉంది. వర్ని పోలీసులు శాంతిభద్రతల పరిరక్షణకు చర్యలు తీసుకుంటున్నప్పటికీ, బెల్ట్‌ షాపుల వ్యవహారంలో ఎక్సైజ్‌ శాఖ మరింత దృష్టి సారించాలని స్థానికులు కోరుతున్నారు.
ఇరిగేషన్‌ స్థలాలపై గతంలో హడావుడి.. ఇప్పుడు నిర్మాణాల సంగతేంటి?
వర్ని బస్టాండ్‌ పరిసరాల్లో నిజాంసాగర్‌ కెనాల్‌ ఇరిగేషన్‌ శాఖకు చెందిన స్థలాల ఆక్రమణకు సంబంధించి గతంలో చర్చ జరిగినప్పటికీ, ప్రస్తుతం మళ్లీ నిర్మాణాలు చేపడుతున్నారనే ఆరోపణలు వ్యక్తమవుతున్నాయి. గతంలో ఈ అంశంపై చర్యల కోసం ప్రయత్నించినవారు ఇప్పుడు జరుగుతున్నాయని చెబుతున్న నిర్మాణాలపై ఎందుకు స్పందించడం లేదని స్థానికులు ప్రశ్నిస్తున్నారు.సంబంధిత ఇరిగేషన్‌ శాఖ, గ్రామపంచాయతీ అధికారులు స్థలాల హద్దులు, యాజమాన్య వివరాలు, నిర్మాణాలకు అనుమతులున్నాయా లేదా అనే అంశాలను పరిశీలించి స్పష్టత ఇవ్వాలని ప్రజలు కోరుతున్నారు.
అధికారులు స్పందించేనా?
వర్ని బస్టాండ్‌ పరిసరాల్లో బెల్ట్‌ షాపుల నిర్వహణ, మద్యం విక్రయాల వేళలు, అదనపు వసూళ్ల ఆరోపణలు, ఇరిగేషన్‌ స్థలాల్లో నిర్మాణాలపై సంబంధిత ఎక్సైజ్‌, పోలీస్‌, ఇరిగేషన్‌, పంచాయతీ శాఖల అధికారులు సమన్వయంతో విచారణ చేపట్టాలని స్థానికులు విజ్ఞప్తి చేస్తున్నారు. నిబంధనల ఉల్లంఘనలు నిర్ధారణ అయితే చట్టప్రకారం చర్యలు తీసుకోవాలని కోరుతున్నారు.
వర్ని బస్టాండ్‌ పరిసరాల్లో పరిస్థితులపై అధికారులు ఎప్పుడు స్పందిస్తారు? బెల్ట్‌ షాపుల ఆరోపణలపై ఎలాంటి చర్యలు తీసుకుంటారు? ఇరిగేషన్‌ స్థలాలపై వస్తున్న ఫిర్యాదులకు ఎప్పుడు పరిష్కారం లభిస్తుంది? అన్నది వేచి చూడాలి.
