దేశాయి బ్రదర్స్ యాజమాన్యంపై చర్యలు తీసుకోవాలని డిమాండ్
నిజామాబాద్,అక్టోబర్ 3:(E6tv NEWS: ప్రతినిధి)
బీడీ కార్మికుల నుంచి వేయి బీడీలకు రూ.10 చొప్పున అదనంగా వసూలు చేస్తున్నట్లు ఆరోపణలు ఎదుర్కొంటున్న దేశాయి బ్రదర్స్ యాజమాన్యంపై చర్యలు తీసుకోవాలని తెలంగాణ ప్రగతిశీల బీడీ వర్కర్స్ యూనియన్, రాజకీయ బీడీ వర్కర్స్ యూనియన్ జేఏసీ నాయకులు డిమాండ్ చేశారు. ఈ మేరకు రాష్ట్ర కార్మిక శాఖ మంత్రి గడ్డం వివేక్‌కు వినతిపత్రం సమర్పించారు.
ఈ సందర్భంగా రాజకీయ బీడీ వర్కర్స్ యూనియన్ జేఏసీ కన్వీనర్ అన్వేష్ రెడ్డి, వి. ప్రభాకర్ మాట్లాడుతూ తెలంగాణలో బీడీ పరిశ్రమపై ఆధారపడి లక్షలాది మంది జీవిస్తున్నారని తెలిపారు. ముఖ్యంగా మహిళా కార్మికులు పెద్ద సంఖ్యలో ఈ రంగంలో పనిచేస్తున్నారని పేర్కొన్నారు. ఉమ్మడి నిజామాబాద్‌తో పాటు కరీంనగర్, మెదక్, నిర్మల్, ఆదిలాబాద్, మహబూబ్‌నగర్ తదితర జిల్లాల్లో బీడీ పరిశ్రమ విస్తరించి ఉందన్నారు.పని దినాలు తగ్గడం, పరిశ్రమలో ఇబ్బందులు కొనసాగుతున్న సమయంలో కార్మికులపై అదనపు ఆర్థిక భారం పడుతోందని వారు ఆవేదన వ్యక్తం చేశారు. దేశాయి బ్రదర్స్ యాజమాన్యం వేయి బీడీలకు రూ.10 చొప్పున అదనంగా వసూలు చేస్తోందని ఆరోపించారు. దీనివల్ల ఇప్పటికే ఆర్థిక ఇబ్బందులు ఎదుర్కొంటున్న బీడీ కార్మికులపై మరింత భారం పడుతోందన్నారు.
లేబర్ అధికారుల తీరుపై ఆరోపణలు
కార్మికుల సమస్యలపై చర్యలు తీసుకోవాల్సిన జిల్లా కార్మిక శాఖ అధికారులు యాజమాన్యానికి అనుకూలంగా వ్యవహరిస్తున్నారని యూనియన్ నాయకులు ఆరోపించారు. దేశాయి బ్రదర్స్ యాజమాన్యంపై పలుమార్లు ఫిర్యాదులు, ఆందోళనలు చేసినప్పటికీ సమస్య పరిష్కారానికి తగిన చర్యలు తీసుకోలేదని విమర్శించారు.
యాజమాన్యంతో లేబర్ అధికారుల సంబంధాలపై వచ్చిన ఆరోపణలను ప్రభుత్వం విచారించి, వాస్తవాలు తేల్చాలని కోరారు. కార్మికుల ప్రయోజనాలను కాపాడాల్సిన అధికారులు విధుల్లో నిర్లక్ష్యం వహిస్తే వారిపై కూడా చర్యలు తీసుకోవాలని రాష్ట్ర కార్మిక శాఖ మంత్రిని కోరారు.
బీడీ కార్మికుల పోరాటానికి మద్దతు
తెలంగాణ రాష్ట్ర ఉర్దూ అకాడమీ చైర్మన్ తహెర్ బిన్ హందాన్ బీడీ కార్మికులకు మద్దతు ప్రకటించారు. కార్మికుల సమస్యల పరిష్కారం కోసం జరుగుతున్న పోరాటానికి తన సంపూర్ణ సహకారం ఉంటుందని తెలిపారు. దేశాయి బ్రదర్స్ యాజమాన్యంపై వచ్చిన ఆరోపణలను పరిశీలించి, కార్మికులకు న్యాయం జరిగేలా చర్యలు తీసుకోవాలని ప్రభుత్వాన్ని కోరారు.బీడీ కార్మికుల నుంచి అదనపు వసూళ్లు జరుగుతున్నాయనే ఆరోపణలపై సమగ్ర విచారణ జరిపి, వాస్తవాలు నిర్ధారించిన అనంతరం బాధ్యులపై చట్టపరమైన చర్యలు తీసుకోవాలని యూనియన్ నాయకులు డిమాండ్ చేశారు.
