ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఢిల్లీ పర్యటనలో బిజీబిజీగా గడపనున్నారు. ఈ పర్యటనలో భాగంగా ఆయన ప్రధానమంత్రి నరేంద్ర మోదీతో పాటు పలువురు కేంద్ర మంత్రులతో వరుస సమావేశాలు నిర్వహించనున్నారు. ప్రధాని మోదీతో భేటీలో విశాఖ మెట్రో రైలు, బీచ్ కారిడార్ అభివృద్ధి, గోదావరి జలాలు, నదుల అనుసంధానం మరియు ఎల్‌నినో ప్రభావం వల్ల కలిగే నష్టాలను ఎదుర్కొనేందుకు కేంద్ర ఆర్థిక సాయం వంటి కీలక అంశాలపై చర్చించనున్నారు. అలాగే రాబోయే గోదావరి పుష్కరాల నిర్వహణకు అవసరమైన మౌలిక వసతుల కోసం కేంద్ర సహకారాన్ని కోరనున్నారు.
ఈ పర్యటనలో కేంద్ర హోంశాఖ మంత్రి అమిత్ షా, జాతీయ రహదారుల ప్రాజెక్టులపై రవాణా శాఖ మంత్రి నితిన్ గడ్కరీ, నీటి ప్రాజెక్టులపై జలశక్తి మంత్రి సీఆర్ పాటిల్ మరియు పారిశ్రామిక అభివృద్ధి, పెట్టుబడులపై వాణిజ్య శాఖ మంత్రి పీయూష్ గోయల్‌లతో సీఎం సమావేశం కానున్నారు. దీనితో పాటు మధ్యాహ్నం 12 గంటలకు జరిగే సీఐఐ (CII) కార్యక్రమంలో పాల్గొని ఆంధ్రప్రదేశ్‌లో పెట్టుబడులకు ఉన్న అవకాశాలు, అందిస్తున్న ప్రోత్సాహకాల గురించి వివరించనున్నారు.
