పశ్చిమ బెంగాల్ మాజీ ముఖ్యమంత్రి మమతా బెనర్జీ, మాజీ కేబినెట్ మంత్రి ఇంద్రనీల్ సేన్‌లపై ఎన్‌ఫోర్స్‌మెంట్ డైరెక్టరేట్ (ఈడీ) సంచలన ఆరోపణలు చేసింది. మనీలాండరింగ్ కేసు దర్యాప్తులో భాగంగా ఇద్దరి పేర్లను ప్రస్తావిస్తూ ఈడీ అధికారిక ప్రకటన విడుదల చేసింది. 2024, 2025 లలో దుర్గాపూజ ప్రివ్యూ షో పాస్‌ల విక్రయాలకు సంబంధించిన ‘మాస్ ఆర్ట్’ కేసే కాకుండా, ఇంద్రనీల్ సేన్‌కు చెందిన ప్రొప్రైటర్‌షిప్ సంస్థ ‘ఆక్టేవ్ రికార్డ్స్’ వ్యవహారంలోనూ ఈడీ వీరిద్దరి పాత్రపై విచారణ జరుపుతోంది.
గతంలో మమతా బెనర్జీ ప్రభుత్వంలో ఇంద్రనీల్ సేన్ పర్యాటక, సాంస్కృతిక శాఖల మంత్రిగా ఉన్న సమయంలో ఆయన సన్నిహితులైన ధ్రువజ్యోతి బోస్, దిపేష్ రాయ్‌లకు చెందిన సంస్థలకు ₹85 కోట్లకు పైగా విలువైన ప్రభుత్వ టెండర్లను అక్రమంగా కట్టబెట్టినట్లు ఈడీ తెలిపింది. ఆ సంస్థల నుంచి పెద్ద ఎత్తున నగదు విత్‌డ్రా చేసి, ఇంద్రనీల్ సేన్ బంధువులకు, ఆయన సంస్థ అయిన ‘ఆక్టేవ్ రికార్డ్స్’ ఖాతాల్లోకి దాదాపు ₹3.3 కోట్లకు పైగా జమ చేసినట్లు ఆధారాలు సేకరించింది. ఈ ‘ఆక్టేవ్ రికార్డ్స్’ ఖాతా నుంచే అప్పటి ముఖ్యమంత్రి మమతా బెనర్జీ బ్యాంకు ఖాతాలోకి బ్యాంకు మార్గాల ద్వారా సుమారు ₹30 లక్షలు బదిలీ అయ్యాయని, దీనిపై ఇంద్రనీల్ సేన్‌ను ప్రశ్నించగా రాయల్టీ రూపంలో చెల్లించినట్లు చెప్పారని ఈడీ పేర్కొంది. ప్రస్తుతం సోదాల్లో స్వాధీనం చేసుకున్న డిజిటల్, పత్ర ఆధారాలతో దర్యాప్తు ముమ్మరం చేసినట్లు ఈడీ స్పష్టం చేయగా, తృణమూల్ కాంగ్రెస్ వర్గాలు మరియు ఇంద్రనీల్ సేన్ దీనిపై ఇంకా స్పందించలేదు.
