ఎంపీ ల్యాడ్స్ నిధులతో సహాయం అందించాలని విజ్ఞప్తి
వ్యక్తిగతంగా ఆర్థిక సహాయం అందిస్తానని హామీ ఇచ్చిన రవికుమార్ యాదవ్
శేరిలింగంపల్లి, అక్టోబర్ 29 (E6 TV NEWS).
శేరిలింగంపల్లి నియోజకవర్గం హఫీజ్‌పేట్ డివిజన్ పరిధిలోని ప్రకాష్ నగర్‌లో సాగర (ఉప్పర) సంఘం భవన నిర్మాణానికి ఆర్థిక సహాయం అందించాలని కోరుతూ సంఘం ప్రతినిధులు చేవెళ్ల ఎంపీ కొండా విశ్వేశ్వర్ రెడ్డి, శేరిలింగంపల్లి బీజేపీ ఎమ్మెల్యే అభ్యర్థి రవికుమార్ యాదవ్‌లను కలిసి వినతిపత్రాలు సమర్పించారు. బీజేపీ రాష్ట్ర ఓబీసీ మోర్చా నాయకుడు బోయిని మహేష్ యాదవ్ నాయకత్వంలో ఈ కార్యక్రమం జరిగింది.
సాగర సంఘం ఆధ్వర్యంలో సామాజిక సేవా కార్యక్రమాలు నిర్వహించేందుకు, స్థానిక ప్రజలకు ఉపయోగపడేలా సంఘ భవనాన్ని నిర్మించుకోవాల్సిన అవసరం ఉందని ప్రతినిధులు వివరించారు. భవన నిర్మాణానికి ఎంపీ ల్యాడ్స్ నిధుల ద్వారా ఆర్థిక సహాయం అందించాలని ఎంపీ కొండా విశ్వేశ్వర్ రెడ్డిని కోరారు.
వినతిపై స్పందించిన ఎంపీ కొండా విశ్వేశ్వర్ రెడ్డి, నిబంధనలు, అందుబాటులో ఉన్న నిధుల మేరకు ఎంపీ ల్యాడ్స్ ద్వారా సహాయం అందించే అంశాన్ని పరిశీలిస్తానని హామీ ఇచ్చినట్లు సంఘం ప్రతినిధులు తెలిపారు. అదేవిధంగా రవికుమార్ యాదవ్ కూడా భవన నిర్మాణానికి తన వంతుగా వ్యక్తిగత ఆర్థిక సహాయం అందిస్తానని హామీ ఇచ్చారు.సంఘ భవనం నిర్మాణం పూర్తయితే సాగర సంఘం సభ్యులతో పాటు స్థానిక ప్రజలకు కూడా ఉపయోగకరంగా ఉంటుందని ప్రతినిధులు పేర్కొన్నారు. సామాజిక ఐక్యతను పెంపొందించడంతోపాటు, సేవా కార్యక్రమాలు నిర్వహించేందుకు భవనం దోహదపడుతుందని ఆశాభావం వ్యక్తం చేశారు.సంఘ అభివృద్ధికి సహాయం అందిస్తామని హామీ ఇచ్చిన ఎంపీ కొండా విశ్వేశ్వర్ రెడ్డి, రవికుమార్ యాదవ్‌లకు సంఘం ప్రతినిధులు కృతజ్ఞతలు తెలిపారు.
ఈ కార్యక్రమంలో సాగర సంఘం గౌరవ అధ్యక్షుడు మెడల గోవర్ధన్ సాగర్, అధ్యక్షుడు శ్రీనివాసులు సాగర్, బీమ్ సేన్ సాగర్, ఆలేటి మూర్తి సాగర్, చిన్న రాయుడు సాగర్, శేఖర్ సాగర్, శ్రీనివాస్ సాగర్ తదితరులు పాల్గొన్నారు.
