అంతర్జాతీయ మార్కెట్‌లో ముడిచమురు ధరల హెచ్చుతగ్గులు మరియు రూపాయి విలువ ఆధారంగా ప్రభుత్వ రంగానికి చెందిన చమురు సంస్థలు వాణిజ్య ఎల్‌పీజీ గ్యాస్ సిలిండర్లతో పాటు విమాన ఇంధనం (ఏటీఎఫ్) ధరలను పెంచుతూ నిర్ణయం తీసుకున్నాయి. అక్టోబర్ 1 నుంచి అమల్లోకి వచ్చిన ఈ నూతన ధరల ప్రకారం, 19 కేజీల వాణిజ్య ఎల్‌పీజీ సిలిండర్ ధర రూ.62.50 పెరిగింది. సెప్టెంబర్‌లో రూ.9.50 పెరిగిన వాణిజ్య సిలిండర్ ధర, ఈ నెలలోనూ మళ్లీ పెరగడం గమనార్హం.
మరోవైపు విమాన ఇంధన (ఏటీఎఫ్) ధర లీటరుకు రూ.16 చొప్పున పెరిగి రూ.137కి చేరింది. విమాన సంస్థల నిర్వహణ వ్యయంలో ఏటీఎఫ్ వాటా దాదాపు 40 శాతంగా ఉన్నందున, ఈ పెంపు విమానయాన రంగంపై తీవ్ర ప్రభావం చూపనుంది. అయితే, గృహ వినియోగానికి ఉపయోగించే 14.2 కేజీల వంటగ్యాస్ సిలిండర్ ధరతో పాటు పెట్రోల్, డీజిల్ ధరల్లో ఎలాంటి మార్పు లేకుండా యథాతథంగా ఉంచడంతో సాధారణ ప్రజలకు కాస్త ఉపశమనం లభించింది.
