ఆంధ్రప్రదేశ్‌లో ఎంపీటీసీ, జడ్పీటీసీ ఎన్నికల నామినేషన్ల ప్రక్రియ తీవ్ర హింసాత్మకంగా మారడంతో రాష్ట్రంలో ఉద్రిక్త పరిస్థితులు నెలకొన్నాయి. గురువారం ఒక్కరోజే రాష్ట్రవ్యాప్తంగా 13 జిల్లాల్లో మొత్తం 31 ఎన్నికల సంబంధిత అల్లర్లు, ఘర్షణలు నమోదయ్యాయి. ఈ పరిణామాలపై డీజీపీ హరీశ్ కుమార్ గుప్తా తీవ్రంగా స్పందించారు. ఎన్నికల ప్రక్రియలో హింసకు పాల్పడేవారు, నామినేషన్లను అడ్డుకునేవారు ఏ రాజకీయ పార్టీకి చెందినవారైనా సరే ఉపేక్షించేది లేదని, కఠిన చర్యలు తప్పవని హెచ్చరించారు.
అనంతపురంలో అత్యధిక ఘటనలు.. నమోదైన మొత్తం 31 ఘటనల్లో 22 భౌతిక ఘర్షణలు, దాడులు కాగా.. 9 చోట్ల నామినేషన్ పత్రాలను లాక్కోవడం లేదా చించివేయడం వంటి చర్యలు జరిగాయి. జిల్లా వారీగా చూస్తే అత్యధికంగా అనంతపురం జిల్లాలో 8 ఘటనలు చోటుచేసుకోగా, అన్నమయ్య, కడప, ప్రకాశం జిల్లాల్లో మూడేసి చొప్పున అల్లర్లు వెలుగుచూశాయి.
ఉగ్రరూపం దాల్చిన ఘర్షణలు.. ఈ హింసాకాండలో దుండగులు రెచ్చిపోయి రెండు కార్లు, రెండు మోటార్‌సైకిళ్లను దగ్ధం చేశారు. ఒకచోట ఏకంగా జేసీబీతో అభ్యర్థి నివాసాన్ని కూల్చివేయగా, మరికొన్ని చోట్ల గాల్లోకి కాల్పులు జరిపారు. రాళ్లు, కర్రలతో జరిగిన ఈ దాడుల్లో ఓ అభ్యర్థితో పాటు మరో వ్యక్తి పరిస్థితి విషమంగా ఉన్నట్లు సమాచారం. అంతేకాకుండా, అభ్యర్థిని రక్షిస్తూ తరలిస్తున్న పోలీసు వాహనంపై జరిగిన రాళ్లదాడిలో ఒక కానిస్టేబుల్ తలకు తీవ్ర గాయాలయ్యాయి.
54 మంది గుర్తింపు.. కఠిన చర్యలకు ఆదేశాలు ఈ ఘటనలపై ఇప్పటివరకు 16 కేసులు నమోదు చేసి మొత్తం 54 మంది నిందితులను గుర్తించినట్లు డీజీపీ వెల్లడించారు. ఈ దాడులకు పాల్పడిన వారు టీడీపీ, వైఎస్సార్‌సీపీ, సీపీఎంలతో పాటు స్వతంత్ర అభ్యర్థుల మద్దతుదారులుగా ఉన్నట్లు తేలిందని, రాజకీయ సంబంధాలతో సంబంధం లేకుండా అందరిపై చట్టపరమైన చర్యలు తీసుకుంటామని స్పష్టం చేశారు. సున్నితమైన ప్రాంతాల్లో అదనపు బలగాలను మోహరించాలని జిల్లా అధికారులను ఆదేశించిన డీజీపీ, ప్రజలు ఎవరైనా బెదిరింపులకు గురైతే వెంటనే డయల్ 100 లేదా 112కు ఫిర్యాదు చేయాలని సూచించారు.
