తెలంగాణలో ఆహార భద్రతపై మరోసారి ఆందోళనకరమైన విషయాలు వెలుగులోకి వచ్చాయి. జయశంకర్ భూపాలపల్లి జిల్లా చిట్యాలలోని ప్రముఖ 7 మిడ్‌వే ప్లాజా (Midway Plaza) లో TG SAFE (ఫుడ్ సేఫ్టీ) అధికారులు ఆకస్మిక తనిఖీలు నిర్వహించారు. ఈ తనిఖీల్లో హోటల్ వంటగదిలో తీవ్ర అపరిశుభ్ర పరిస్థితులు బయటపడటంతో అధికారులు విస్మయం వ్యక్తం చేశారు.
ఆహార పదార్థాలు నిల్వ చేసే ప్రదేశాల్లో బొద్దింకలు, ఈగలు సంచరిస్తుండటంతో పాటు, వంట తయారీకి ఉపయోగిస్తున్న యంత్రాలు పూర్తిగా తుప్పుపట్టి ఉన్నట్లు అధికారులు గుర్తించారు. ముఖ్యంగా వంటగదిలో నిల్వ ఉంచిన విడి పెసరపప్పులో పురుగులు ఉండటాన్ని పరిశీలించి తీవ్ర అసంతృప్తి వ్యక్తం చేశారు. తక్షణమే ఆ పెసరపప్పు నమూనాను (Sample) సేకరించి, ప్రయోగశాల (Lab) పరీక్షలకు పంపేందుకు తగిన చర్యలు చేపట్టారు.
ప్రజలకు నాణ్యమైన, సురక్షితమైన ఆహారం అందించాల్సిన ప్రదేశాల్లో కనీస పరిశుభ్రత పాటించకపోవడం వినియోగదారుల ఆరోగ్యానికి ముప్పుగా మారుతుందని అధికారులు హెచ్చరించారు. ప్రయోగశాల పరీక్షల నివేదికలు వచ్చిన తర్వాత నిర్వాహకులపై తగిన చట్టపరమైన చర్యలు తీసుకోనున్నట్లు తెలిపారు.
